Башкортстан Татар конгрессы Башкарма комитеты республикада зур уңышларга ирешкән татар теле һәм әдәбияты укытучылары өчен матур кичә оештырды.

Башкортстанда әле генә “Ел укытучысы-2009” республика бәйгесе тәмамланды. Анда быел 35 татар теле һәм әдәбияты укытучысы да көч сынашты. Әлеге киеренке бәйгедә татар мөгаллимнәре арасыннан Агыйдел шәһәрендәге 2нче санлы урта мәктәпнең татар теле һәм әдәбияты укытучысы Әдибә Хаҗиева “Ел укытучысы” исеменә лаек булды. Тагын дистәгә якын татар укытучысына Мәгариф министрлыгы бүләкләре тапшырылды.

Менә шул алдынгы мөгаллимнәрне Башкортстан Татар конгрессы Башкарма комитеты җитәкчеләре дә үзләренә кунакка чакырды. Милләт балаларына яхшы белем һәм төпле тәрбия биргән тәҗрибәле укытучыларга Татар конгрессы махсус бүләкләр дә әзерләгән иде. Шушы кичә барышында, тантаналы шартларда ул бүләкләр дә тапшырылды һәм җылы котлау сүзләре әйтелде.

Очрашу барышында Бөтендөнья Татар конгрессының Башкортстандагы даими вәкиле Алик Локманов, Башкортстан Татар милли-мәдәни мохтарияте рәисе урынбасары, профессор Мәҗит Хуҗин һәм башка татар милли оешмалар җитәкчеләре татар укытучыларына киләчәк эшләрендә дә уңышлар теләде һәм уртак бурычлар хакында фикерләре белән уртаклашты.

Чыганак: www.tat.tatar-inform.ru