Татар мәгарифе порталы
Сез монда
“Хәзер укытучыларны яңадан әзерләргә кирәк. Татар теле һәм әдәбияты укытучылары башка укытучылардан һич кенә дә калышырга тиеш түгел”, - дип белдерде 27нче март көнне Татарстан Республикасының Мәгариф һәм фән министрлыгының милли мәгариф һәм төбәкара хезмәттәшлек бүлеге башлыгы Рәиф Зиннәтуллин. Бүген Татар теле һәм әдәбияты укытучылары Татарстан Республикасының Мәгарифне үстерү институты базасында оештырылган “Татар теле һәм әдәбияты укытучыларының квалификациясен күтәрү” дигән секция утырышында.
Рәиф Зиннәтуллин үз чыгышында Татарстан Республикасының Мәгариф һәм фән министрлыгы тарафыннан татар теле һәм әдәбияты буенча стандартлар кабул ителүен, хәзер укыту программалары һәм дәреслекләр эшләргә кирәклеген белдерде. Бу эштә ул Татарстан Республикасының Мәгарифне үстерү институтына зур өметләр баглавын һәм аның базасында укытучылар ярдәмендә, татар галимнәрен дә җәлеп итеп, дәреслекләр эшләү буенча методик үзәк төзү фикере барлыгын да билгеләп үтте. Сүз гадәти дәреслекләр белән беррәттән, заманча интерактив дәреслекләр төзү турында бара.
Раиф Зиннәтуллин татар теле белән бәйле вәзгыятькә бәя биреп: “Билгеле, хәл мактанырлык түгел. Без шулай да төшенкелеккә бирелергә җыенмыйбыз. Хәзерге вакытта федераль органнар белән эш алып барыла. Татарстан Республикасының Мәгариф һәм фән министрының беренче урынбасары Данил Мәхмүтович Мостафин Мәскәүдә булып кайтты. Яңа федераль белем бирү стандартлары буенча инде икенче тапкыр парламент тыңлаулары уздырылды. Әле федераль стандартлар расланмаган”, - диде.
Раиф Зиннәтуллин төбәкләр белән эш мәсьәләсенә тукталып, алар өчен укыту программалары һәм аерым дәреслекләр төзү турында уйларга кирәклеген белдерде. Чөнки бүгенге көндә татарлар тупланып яшәгән төбәкләрдә татар теле һәм әдәбияты дәресләре 2-4 сәгать күләмендә генә укытыла. Уку йортлары үзләре өчен татар телендә укыту өчен чыгарылган программаларны түгел, рус мәктәпләре өчен булганын сайлап ала икән.
Чыганак: www.tat.tatar-inform.ru