Россия Федерациясенең Мәгариф һәм фән министрлыгы БДБ илләре арасында балалар үзәкләре ассоциациясен төзергә тәкъдим итә. Министр урынбасары Юрий Сентюрин хәбәр итүенчә, ул вакытта үзәкләр бер-берсенә ярдәм итеп эшләячәкләр.

Бөтендөньяга мәгълүм «Артек» лагеры Украина бюджетыннан акча алмау аркасында бөлгенлеккә төшү хәлендә. 30 ел рәттән ялсыз эшләүче лагерь быел беренче тапкыр кышкы сменага балалар кабул итә алмады.

Бу уңайдан Россия Мәгариф һәм фән министрлыгында махсус тәкъдим булдырылган. Ведомствоара комиссия исеменнән БДБ илләрендә урнашкан “Артек”, “Молодая гвардия”, “Зубренок” кебек балалар лагерьларына уртак ассоцияция яисә оешма, берләшмә составына керү турында тәкъдим ясарга планлаштырыла.

Министр урынбасары сүзләренә караганда, ассоциация «гуманитар характердагы акцияләр белән шөгыльләнергә мөмкин»: балалар, иҗади программалар белән алмашу, бергә юлламалар тарату. Киләчәктә “Артек”ның юлламалары сатып алынып, төрле регион балалары «Артек», «Зубренок» һәм башка лагерьларга ял итәргә җибәрелергә мөмкин. Министр урынбасары ассызыклавынча, оешма төзүнең төп масаты юлламаларны таратуда түгел, ә төрле лагерьларны бер үзәк кысаларында туплау. Бу, үз чиратында, дустанә мөнәсәбәтләрне нәтиҗәле урнаштырырга ярдәм итәчәк.

Беренче этапта әлеге ассоцияция Россия, Украина һәм Белоруссия балалар үзәкләре берләштерергә мөмкин. Координацион үзәкне Мәскәүдә эшләргә була, дип саныйлар министрлыкта.

Чыганак: window.edu.ru