Агымдагы елның 16-18 февралендә Казанда “Конкурентлыкка сәләтле шәхесне өстәмә белем бирү чаралары ярдәмендә формалаштыру” дип аталган төбәкара фәнни-гамәли конференция уза. Татарстан Республикасының Мәгариф һәм фән министрлыгыннан алынган мәгълүматларга караганда, җыенны Россия Федерациясенең Мәгариф һәм фән министрлыгы Мәгариф буенча федераль агентлыкның Яшьләр эшләре буенча идарәсе, Татарстан Мәгариф һәм фән министрлыгы, Россия белем бирү академиясенең һөнәри белем бирү педагогика һәм психология институты, Казан шәһәренең “Мәктәптән тыш эш үзәге” оештыра.

Конференция барышында гомуми һәм өстәмә белем бирү оешмаларының укучылардагы профильле әзерлеккә йогынтысы, кадрлар әзерләү, өстәмә белем бирү оешмалары эшчәнлеген бәяләү критерийлары һәм башка мәсьәләләр күтәрелер дип көтелә.

Җыен вакытында секцияләр, мастер-класслар, семинарлар, презентацияләр, “түгәрәк өстәлләр”, ачык дәресләр кебек чаралар, педагогика фәннәре докторы, Халыкара өстәмә белем бирү академиясе президенты В. Горскийның “Өстәмә белем бирүнең сыйфатын өйрәнү” дип аталган семинар-практикум уздыруы көтелә.

Чыганак: “Татар-информ”