Быел Казанда 11 сыйныфны тәмамлаучы 1 114 укучы «Укудагы аеруча уңышлары» өчен медале алырга мөмкин. Ул беренче мәртәбә ике дәрәҗәдә тапшырыла: I дәрәҗәдәге медальгә – 653 бала, II дәрәҗәдәгесенә 461 бала дәгъва итә. Бу чыгарылышы укучыларының гомуми саныннан якынча 18 процент. Бу хакта эшлекле дүшәмбедә Казан башкарам комитетының Мәгариф идарәсе җитәкчесе Ирек Ризванов сөйләде.

I дәрәҗәдәге бүләк алу өчен барлык фәннәрдән дә бик яхшы билгеләр, рус теле һәм тагын бер фәннән бердәм дәүләт имтиханында кимендә 70 балл (яки база математикасында 5 балл) булырга тиеш. II дәрәҗәдәге медальне бик яхшы билгеләр һәм «дүртле» билгесе икедән артык булмаган, ә рус теле һәм сайланган имтиханнан кимендә 60 балл (яки шулай ук база математикасыннан 5 балл) җыйган укучылар ала.

Бик яхшы билгеләреннән генә торган аттестатны тугызынчы сыйныфны тәмамлаучы 1062 укучы алырга мөмкин – бу Казанда 9нчы сыйныф тәмамлаучы укучыларының гомуми саныннан 7 процент тәшкил итә.

Йомгаклау аттестация уздырырга шәһәрдә БДИ өчен – 76, ОГЭ өчен – 58, ГВЭ өчен – 10 пункт, шулай ук сәламәтлек мөмкинлекләре чикле балаларга өйдә имтихан тапшыру өчен 91 пункт әзерләнгән. Имтиханнарны 10 мең педагог уздырачак.

Тугызынчы сыйныфлар өчен имтиханнар – 21 майдан, ә 11 сыйныфлар өчен 23 майдан башлана. 9 сыйныфта дүрт – рус теле, математика һәм ике сайланма фәннән имтихан тапшырырга кирәк. 11 сыйныфта рус теле һәм математикадан (база яки профиль) тапшыралар.

Тугызынчы сыйныф укучылары арасында сайланма фәннәр арасында иң популярлары – информатика (44,1 процент), җәмгыять белеме (42,9 процент) һәм география (41 процент). 11 сыйныф тәмамлаучылар арасында профильле математика (57,9 процент), җәмгыять белеме (36,2 процент) һәм информатика (25,7 процент) алдынгы.

Россия Президенты Владимир Путин инициативасы буенча быел укучылар беренче тапкыр сайланма фән буенча имтиханны 3 һәм 4 июльдә киредән тапшыра алачак. Бары тик киредән тапшырылган имтихан нәтиҗәсе генә исәпкә алына.

2025 елда Казан мәктәпләрендә тугызынчы сыйныфны 15 133 укучы һәм 11 сыйныфны 6 151 укучы тәмамлый. Югары уку йортларында кабул итү кампаниясе 20 июньдә башлана.

Талантлы яшьләргә ярдәм итү һәм казанышлар өчен бүләкләү системасы «Яшьләр һәм балалар» илкүләм проекты максатларына туры килә. Бу проект үсеп килүче буынны төрле яклап үстерүгә, белем бирү сыйфатын яхшыртуга һәм һәр укучының сәләтләрен ачу өчен шартлар булдыруга юнәлдерелгән.

Фото чыганагы: https://kzn.ru