Казанлылар беренче шәһәр яшь башкаручылар конкурсында катнаша ала. 18 яшьтән 35 яшькә кадәрге кешеләрдән гаризалар 20 нче августка кадәр өч юнәлеш буенча кабул ителә: академик вокал, эстрада-джаз вокалы һәм халык вокалы.

Конкурс ике этапта узачак. Беренче этапта катнашучыларга теләсә нинди композицияне башкаручы видео-визитка яздырырга һәм сылтама буенча анкета тутырырга кирәк. Материалларны priemnaya.fil@mail.ru электрон почтасы аша җибәрү сорала. Тулырак мәгълүмат сылтама буенча нигезләмәдә бар.

Икенче тур 22 нче августта «Чулпан» мәдәният үзәгендә узачак. Конкурсантларны Татарстанның мәдәният һәм сәнгать эшлеклеләре бәяләячәк. Катнашучыларга сайланган номинация буенча композицияне шәхсән башкарырга туры киләчәк.

Конкурс лауреатлары һәм Гран-при иясе 30 нчы августта Республика һәм Казан көнен бәйрәм итүнең төп сәхнәсендә чыгыш ясау мөмкинлеге алачак һәм киләчәктә Казан Мэриясе оештырган зур шәһәр фестивальләрендә катнаша алачак.