Бәйгене үткәрүнең максаты һәм бурычлары:

Бәйге Интернет челтәренең татар сегментында (Татнетта) мәгълүмати технологияләр юнәлешендә сәләтле балаларны барлау һәм алар белән эшләү, аларны «Белем җәүһәрләре» һ.б. дәрәҗәле интернет-проектлар бәйгеләренә әзерләү максатыннан чыгып үткәрелә һәм түбәндәге бурычларны күз алдында тота:

• укучыларда Интернет челтәренең татар сегментын һәм Интернет челтәрендә татар телен файдалануга карата кызыксыну уяту;
• заманча технологияләрне, интернет-проектлар ясау нигезләрен яхшы белгән әхлаклы, белемле татар балаларының санын арттыру, аларны таныту, башкаларга үрнәк итеп кую.

Оештыру комитеты һәм жюри составы:

Бәйге Татнетны үстерү фонды (http://tat-i.net) һәм Татарстан Республикасы Яр Чаллы шәһәре «Мулланур Вахитов исемендәге 2 нче гимназия» муниципаль бюджет гомуми белем бирү учреждениесе тарафыннан оештырыла.

Бәйгегә кабул ителә торган сайтларга таләпләр:

• сайт татар телендә эшләнгән һәм татар телендә файдалы мәгълүматны үз эченә алырга тиеш. Сайт берничә телдә эшләгән очракта аның килешү буенча төп теле татар теле булырга тиеш;
• сайт авторы сайт ясау өчен әзер платформа куллана яисә сайтны программалау телендә үзе төзи ала;
• сайт авторы сайт өчен әзер дизайн-шаблоннар куллана ала, әмма үз дизайнын ясаган очракта, сайт югарырак бәяләнәчәк;
• сайт авторы сайт өчен әзер материаллар куллана ала, әмма үз материалларын урнаштырган очракта, сайт югарырак бәяләнәчәк.

Бәйгене үткәрү тәртибе һәм этаплары:

• I этап. Гаризалар кабул итү: 3 – 23 апрель
• II этап. Җиңүчеләрне билгеләү: 24 – 30 апрель
• III этап. Җиңүчеләрне бүләкләү: ~ 16 май (төгәл дата 1 майдан да соңга калмыйча оештыручыларның сайтларында урнаштырыла)

Бәйгедә гамәлдә булып эшләп килүче сайты белән I-IX сыйныф укучылары – сайт авторлары катнаша ала. Бәйгедә катнашу өчен электрон формада гариза тутырылып (бланк беркетелгән) 23 нче апрельдән дә соңга калмый fondtatnet@yandex.ru электрон адресына юлларга кирәк.