28 февральдә Татарстан халкы сирәк очрый торган астрономик күренешне – планеталар парадын күрәчәк. Айның соңгы көнендә Кояш системасының җиде планетасы – Меркурий, Венера, Марс, Юпитер, Сатурн, Уран, Нептун – «бер сызыкка» төзеләчәк.

«Чынлыкта исә бу сызык түгел, ә хыялланган дуга, чөнки күк гөмбәзе ярымсфера булып тора, ә космик гәүдәләр эллиптик орбита буйлап хәрәкәт итә һәм эклиптиклар яссылыгында ята», – дип физика институтының астрономия һәм космик геодезия кафедрасы профессоры, КФУ ның В.П.Энгельгардт исемендәге Астрономия обсерваториясе фәнни җитәкчесе Юрий Нефедьев сүзләрен китерә университет матбугат хезмәте.

Марс Игезәкләр йолдызлыгындагы көньяк офык өстендә биектә булачак. Аңардан бераз түбәнрәк Үгезбозау йолдызлыгында Юпитер күренер. Уранны Кучкар йолдызлыгында, Үгезбозау чиге янында табарга мөмкин.

Иң якты планета, Венера, көнбатыш офыктан ерак түгел Балык йолдызлыгында урнашачак һәм урак кебек күренәчәк. Нептун көнбатыш офыктан бераз югарырак шул ук йолдызлыкта күренә. Кояшка якын булганлыктан, Сукояр йолдызлыгындагы горизонт янындагы Меркурийны күрүе кыен булыр; аны бары тик таң атканда яисә кояш баеганда гына күрергә мөмкин. Сатурн күзәтү өчен иң катлаулы объект булачак, чөнки ул Сукояр йолдызлыгында горизонт өстендә бик түбән булачак.

Галим аңлатканча, планеталар йолдызлардан аермалы буларак, җемелдәмиләр. Планеталарның парады яңа ай тууы белән туры килә, шуңа күрә Татарстан халкы яхшы һава торышы вакытында Уран һәм Нептун кебек ерактагы объектларны күзәтә алачак. Моның өчен яхшы оптик телескоп кирәк булачак. Уңайлы һава шартларында телескопта Марс дискын һәм Юпитер өслегендәге сызыкларны, шулай ук, бәлки, аның атаклы кызыл тапларын күрергә мөмкин булачак. Ләкин аның тыгыз атмосферасы аркасында Венера өслеген Җирдән күреп булмый.

Юрий Нефедьев билгеләп үткәнчә, 28 февральдә һава шартлары күзәтү өчен уңайсыз булса да, планеталарның парадын элек тә, соңрак та күрергә мөмкин булачак. Ул өстәп әйткәнчә, инде хәзер үк Кояш баеганнан соң берничә планетаны карарга мөмкин, алар әлегә дугага тезелеп җитмәгән, ләкин акрынлап бу форматка якынлашалар. Моннан тыш, быел планеталарның тагын өч кече парады көтелә.