Көллият һәм техникум тәмамлаучылар өчен демонстрацион имтихан дәүләт йомгаклау аттестациясенең төп формасы булырга мөмкин. «Россия Федерациясендә мәгариф турында» һәм «Квалификацияне бәйсез бәяләү турында» законнарга бу төзәтмәләр проектын Дәүләт Думасына сенаторлар төркеме кертте, дип яза «Российская газета».

«Деманстрацион имтихан билгеле бер җитештерүгә мөмкин кадәр якынайтылган шартларда һәм җиһазларда уздырыла. Бу эш бирүчеләргә урта һөнәри белем бирү оешмаларын тәмамлаучыларның алга таба эшкә урнашу өчен гамәли күнекмәләрен, мөмкинлекләрен сынарга булыша. Безнең закон проекты конкрет эш бирүче соравына ихтыяҗ булган кадрларны әзерләүнең күрсәтелгән моделен закон белән беркетүне тәкъдим итә. Ул кадрлар әзерләү процессында – мәгариф оешмасы белән идарә итүдә, белем бирү программаларын эшләүдә, практик әзерләүдә һәм киләчәктә эшкә урнашу өчен чыгарылышның сыйфатын бәяләүдә комплекслы катнаша алачак», – дип сөйләгән Федерация Советының фән, мәгариф һәм мәдәният комитеты рәисе Лилия Гомәрова.

Контроль-тикшерү материалларын Мәгариф министрлыгы әзерли, ә демонстрацион имтиханны үткәрүне тәэмин итү вәкаләтләре белем бирү эшчәнлеген гамәлгә ашыручы оешмалар карамагыннан мәгариф өлкәсендә идарә белән шөгыльләнүче региональ башкарма хакимият органнары карамагына тапшырылачак.

Моннан тыш, квалификацияне бәйсез бәяләү системасында демонстрацион имтиханны танырга тәкъдим ителә. Аның нәтиҗәләре буенча квалификация турында таныклыклар квалификацияне бәйсез бәяләүне үткәрү турындагы белешмәләрнең электрон реестрына кертеләчәк.