Россия Хөкүмәтендә «Пушкин картасының» функцияләрен киңәйтү мөмкинлеге хакында фикер алышалар. Әйтик, балаларны экскурсияләр, театрлар яки кинотеатрларга озатып йөрүче укытучыларга да аннан файдаланырга рөхсәт итәргә мөмкиннәр. Дәүләт Думасының мәгариф комитеты рәисе Ольга Казакова шулай дип белдерде. 

«Педагоглар белән очрашуларда «Пушкин картасы» турында һәрвакыт сорау бирәләр. Чөнки укытучылар фикеренчә, балаларны озата барганда аларның учреждениегә керү өчен законлы һәм легаль мөмкинлеге булырга тиеш», - дип искәртте депутат.

Казакова билгеләп үткәнчә, мөгаллимнәр экскурсия вакытында «ишек артында көтеп торырга» тиеш түгел. Киресенчә, аларның алдан сөйләшеп куймыйча гына учреждениегә керү мөмкинлеге булуы шарт.