Бүген, 17нче февраль көнне, Татарстан Республикасы Иҗтимагый палатасында «Тел, җәмгыять һәм мәгълүмати технологияләр» II Россиякүләм фәнни-гамәли конференциясенең пленар утырышы узды.

Пленар утырыш вакытында мәгълүмати һәм цифрлы технологияләр, кушымталар, медиабелем, цифрлаштыру, тел һәм җәмгыять темалары каралды. 
Конференциядә җаваплылыгы чикләнгән "Белем.ру" оешмасы директоры, "Татнетны үстерү фонды" коммерцияле булмаган җәмгыятенең башкаручы директоры Раил Мәүлет улы Гатауллин да чыгыш ясады. Ул пленар утырышта катнашучыларны “Белем.ру” интернет-порталы, “Татнетны үстерү фонды” коммерцияле булмаган җәмгыяте эшчәнлеге, “Белем Академиясе”, балалар һәм яшүсмерләр өчен билингваль "Белем радиосы" интернет-радиосы һәм башка проектлар белән таныштырып узды.  

Пленар чыгыш оффлайн һәм онлайн форматта барды, шулай ук видеога яздырылды. Конференциянең секцияләр эше иртәгә, 18.02.2023, 11:00 сәгатьтә Казан шәһәре Идел буе районының «16 нчы татар-инглиз гимназиясе»ндә узачак.