2022 елның 6 октябрендә Шәриф Камалның мемориаль фатиры татар әдәбияты тарихы музее (Татар китабы йорты) педагог һәм галим Нургали Надеевның 140 еллыгын билгеләп үтә. Музейда күргәзмә ачылачак, мемориаль такта янында чәчәкләр куелачак һәм түгәрәк өстәл утырышы узачак.

Нургали Надеев (1882-1940) – Россия тарихы буенча татар телендә беренче дәреслекләр авторы, Оренбургтагы татар педагогия институтының беренче директоры һәм Казан педагогия институты доценты. Тарихка ул 13 яшьлек Муса Җәлилне урам тормышыннан аралап, малайны хәрби-сәяси мәктәпкә алып баручы кеше буларак керә. Надеев тормышында тарихи очрашулар болай да күп була. Ул Саратов губернасында туган, Казанда Гаяз Исхакый белән бер мәдрәсәдә укыган, Оренбургта Фатыйх Кәрими һәм Шәриф Камал белән бергә эшләгән. 1925 елдан соң ул хәзерге вакытта Шәриф Камал музее ачылган йортта яши.

6 октябрьдә музей тарихында беренче тапкыр «Нургали Надеев: Гыйлем җәүһәрләре» күргәзмәсе ачыла. Монда Надеевлар гаилә архивыннан уникаль фотосурәтләр һәм кулъязмалар, Милли музей фондыннан һәм Лобачевский исемендәге Фәнни китапханәдән китаплар, шулай ук Казан дәүләт архитектура-төзелеш университетының тарих музееннан экспонатлар күрсәтеләчәк.

Чарада катнашучылар татар китабы йорты фасадындагы мемориаль тактага чәчәкләр куячаклар. Нургали Надеев хөрмәтенә такта 1983 елда ук куела, ә соңгы елларда реставрациядә була. Быел Истәлек билгесе ниһаять үз урынына кайта.

Чара татар китабы йорты һәм ТР Фәннәр академиясенең Мәрҗани исемендәге Тарих институты тарафыннан оештырылган түгәрәк өстәл белән дәвам итәчәк. Галим тормышының билгесез периодлары турында чыгышлар булачак.

6 октябрьдә булачак чараларның программасы:

14.00 – Нургали Надиев: Гыйлем җәүһәрләре» күргәзмәсен ачу тантанасы һәм мемориаль тактага чәчәкләр салу.

14.30 – «Нургали Надиев һәм XIX гасыр ахыры – XX гасыр башы татар мәгариф һәм мәгърифәт эшчәнлеге» түгәрәк өстәл утырышы.

Чаралар Татар китабы йортында үткәрелә. Адресы: Казан, Островский урамы, 15 йорт.

Аккредитация СМИ: nagimov@tatmuseum.ru , +7 965 596-88-78