15 — 22 февральдә Мифтахетдин Акмулла исемендәге Башкорт дәүләт педагогика университеты «Ана теле — 2021» дип исемләнгән XIII Бөтенроссия педагогик осталык конкурсын уздыра. Бәйге быел онлайн форматта үтә.

Бәйгедә катнашырга Башкортстан Республикасының һәм Россия Федерациясе төбәкләренең югары һәм урта һөнәри уку йортларындагы татар филологиясе факультетлары һәм бүлекләре студентлары чакырыла. Гаризаларны 15 февральгә кадәр ru_gareeva@mail.ru электрон почтасына җибәрү сорала. 

Беренче этапта биш минуттан артык булмаган үзең турында таныштыру видеоязмасын җибәрергә кирәк. Икенче этапта катнашучылар иҗади номерларын тәкъдим итә. Өченче этапта катнашучыларның фән өлкәсендәге осталыгы бәяләнәчәк. «Студентлар 17 февральгә кадәр татар теле һәм татар әдәбиятыннан план-конспект җибәрә һәм 18 — 20 февральдә Zoom кушымтасы аша дәресләрен күрсәтә», — диде галим.

Катнашучылар 19 — 20 февральдә бәяләнәчәк. Нәтиҗәләр 22 февральдә рәсми рәвештә Башкорт дәүләт педагогика университеты сайтында игълан ителәчәк.

Бәйге татар теле һәм әдәбияты укытучылары булачак студентларны барлау, аларга ярдәм итү, татар теле һәм әдәбияты укытучысы һөнәренең абруен күтәрү, студентлар арасында укытучының уңай образын формалаштыру максаты белән үткәрелә.