Сбербанк мәктәпләр өчен махсус камера уйлап тапкан. Аны 1нче сентябрьдән Россия мәктәпләрендә кулланырга телиләр. Әлеге җайланма битлекләр артына яшерелгән йөзләрне танып белә алачак. Моннан тыш, анда термометр функциясе дә булачак.

Әлеге аппаратны Фән һәм югары белем бирү министры Валерий Фальковка да тәкъдим иткәннәр. Сбербанк башлыгы Герман Греф әйтүенчә, бу җайланма мәктәпләр һәм башка уку йортлары өчен махсус рәвештә ясалган. Аны 1нче сентябрьдән куллана башларга телиләр.

Камера эшләүнең төп принцибы шунда: аны куллану өчен укучыларны туктатырга кирәкми. Аппарат кеше агымындагы мәгълүматларны туплый, аны операцион система ярдәмендә анализлый. Әгәр битлек кигән кешене мәгълүматлар базасы танып алса һәм аның температурасы нормаль булса, аңа турникет уку йортына керергә рөхсәт итәчәк. Әгәр шушы ике параметрларның берсе генә булса да, үтәлмәсә, укучы бинага керә алмаячак.