1 сентябрьдә Россия мәктәпләре якынча 1,7 миллион беренче сыйныф укучысын кабул итәчәк, дип хәбәр итте вице-премьер Ольга Голодец Светлогорскта (Калининград өлкәсе) узган Август педагогика форумы кысаларында. Бу хакта “Интерфакс” җиткерә.

Россия хөкүмәте сайтында хәбәр ителгәнчә, быелның 1 сентябрендә ил мәктәпләренә 14,7 миллионнан артык укучы барачак. Шуларның якынча 1,7 миллионы беренче сыйныфка кабул ителә.

1 сентябрьдә күп милләтле Россия Федерациясендә 40 мең укучыга исәпләнгән 76 яңа мәктәп ачыла.

Голодец шулай ук билгеләп үткәнчә, 2017 ел ахырына кадәр урта гомуми белем мәктәпләре өчен Федераль дәүләт белем бирү стандартының (ФГОС) яңа редакциясе әзерләнәчәк.

Август педагогия форумы традицион рәвештә Светлогорскта уза. Форумның быелгы үзәк чарасы - "Рус теле - гражданлык тәңгәллегенең нигезе" төбәкара конференциясе. Анда 2 меңнән артык мөгаллим катнаша.