Татар мәгарифе порталы
Сез монда
Ульяновски өлкәсенең Яңа Малыклы районында Иске Төгәлбуа атлы зур татар авылы бар. Бүген аларда зур бәйрәм – дистә еллар бөтен авыл халкы – яше, карты көткән татар мәктәбе ачылды. Ниһаять, балаларыбыз замана таләпләренә тулысынча җавап бирүче мәгариф учагында белем алачак, диләр бәхетле ата-аналар.
Яңа мәктәпне ачу тантанасында Ульяновски өлкәсе губернаторы Сергей Морозов та булган. Губернатор сүзләренә караганда, мәктәпне төзү эшләренә федераль, өлкә һәм район бюджетыннан барлыгы 16 миллион сум акча тотылган. Ләкин мәктәпне “төзү” эше дәвам итә – аның матди-техник базасын ныгытуда Дәүләт Думасының мәгариф буенча комитеты рәисе Григорий Балыхин ярдәм итәчәк икән.
Яңа Малыклы районы башлыгы Ильяс Мөхетдинов сүзләренә караганда, алар татар мәктәбе турында үткән гасырның сиксәненче елларыннан ук хыялланганнар. Ләкин хәзерге губернаторлары Сергей Морозов кына бу мәсьәләне ахырга җиткергән. Ахыры бик матур – Иске Төгәлбуа авылында ике катлы бина мәктәп укучыларын ана телендә укытырга көтә. Биредә әле заманадан калышырга телми, нәниләрне мәктәпкә әзерләү группасы, ягъни балалар бакчасы да эшләячәк. Мәктәпнең заманча җиһазландырылган ашханәсе һәм китапханәсе дә бар, - дип бүлешә Ильяс Нәкыйтдин улы.
Район башлыгы яңа мәктәпкә интерактив такта комплекты юнәтү өчен сертификат та тапшырган. Өлкә татар мохтәрияте рәисе Фәрит Әюпов та олуг тантанага буш кул белән килмәгән – төсле принтер һәм «Әлифба» дәреслекләре, татарча китаплар бүләк иткән.
Казаннан да кунаклар бар. Лирон ага Хәмидуллин мәктәп китапханәсен үз һәм мәшһүр язучыларыбызның әсәрләре белән тулыландырган.
Иске Төгәлбуа авылының яңа мәктәбе - соңгы сигез ел эчендә Ульяновски өлкәсендә сафка бастырылган беренче мәгариф учагы икән. Әлеге мәктәпнең нәкъ татар-мөселман авылында ачылуы аеруча шатландыра һәм өлкә губернаторының милли сәясәтне дөрес юнәлештә алып баруына тагын бер тапкыр инандыра.
“Татар–Информ” мәгълүматлары кулланылып әзерләнде