Татар мәгарифе порталы
Хөрмәтле татар әдәбиятын сөючеләр!
Иртәгә, айның соңгы көнендә, сентябрь аена нәтиҗәләр ясап, 24 сәгать дәвамында I Россиякүләм "Әдәби җәүһәрләр" татар әдәбиятын сөючеләр бәйгесенең беренче онлайн-викторинасы үткәреләчәк.
Бәйге 2 турда узачагын исегезгә төшерәбез - беренче турда 7 ай (сентябрь-март) дәвамында 7 татар әдибенә (язучы, шагыйрь, драматург) багышланган 7 онлайн-викторина үткәреләчәк. Шул рәвешле, 7 финалист сайлап алыначак, алар апрель аенда үткәреләчәк финал турында катнашачаклар.
Беренче турның сентябрь ае татар драматургы һәм актёры Таҗи Гыйззәткә багышланды, бәйге башлануның беренче көннәреннән үк Белем.ру порталында кулланучыларга аның турында мәгълүмат тәкъдим ителде.
Беренче викторинада "Татнетны үстерү фонды" һәм "Белем.ру" порталы хезмәткәрләре әзерләгән 25 сорау булачак, викторинада драматургның тормыш юлы һәм иҗаты белән бәйле сораулар очрар. Аларга мөмкин кадәр тиз һәм төгәл җавап бирергә тырышыгыз.
Гомуми нәтиҗәләр процентларда күрсәтеләчәк. Дөрес җаваплар саны 40% тан арткан очракта тест уңышлы үтелгән дип санала һәм викторинада катнашучы рәсми сертификатлар (электрон һәм/яисә кәгазь вариантларда) сорату хокукына ия була.
Нәтиҗәләр ясалганда тест үтүченең процентларда күпме балл җыюы һәм әлеге викторина сорауларына никадәр тиз җавап бирүе игътибарга алыначак. Мисал өчен, ике кеше 100% максималь балл җыя икән, алар арасыннан тест сорауларына тизрәк җавап биргән кулланучы җиңүче дип игълан ителәчәк (бәйге турында калган барлык мәгълүматны Конкурслар битеннән карый аласыз).
Тестны бары тик бер мәртәбә генә үтәргә мөмкин! Игътибарлы булыгыз!
Барыгызга да уңышлар телибез! Хәерле сәгатьтә!