Г.Камал исемендәге Татар дәүләт Академия театры “Һөнәр” VI яшь режиссура фестивале кысаларында драматургия лабораториясендә катнашу өчен яшь авторлар өчен синопсислар конкурсы игълан итә. 

Әгәр синең пьеса язу тәҗрибәң юк, әмма син театрны беләсең һәм яратасың икән; синең үзеңне проза һәм поэзиядә, шулай ук, журналист һәм эссеист буларак сынап караганың бар, син әдәби талантка ия һәм тирә-юньгә игътибарлы икән; тормышыбызның проблемаларын, яшәешебезнең җитешсез якларын күрәсең, яхшы якларын бәяли аласың, нинди дә булса тарихны ышандырырлык итеп сөйли беләсең икән: кешеләр турында, аларның язмышы, борчулары, шатлыклары хакында...  

Нәрсә соң ул синопсис? Ул син кешеләргә җиткерергә теләгән нинди дә булса вакыйганың кыскача эчтәлеге. Мәрьям Тәлгатьне ярата, тик күрше егете Рәмзил аларның өйләнешүләренә каршы... Аның ире командировкадан кайтты һәм... Сугыш кинәт башланды һәм кинәт тәмамланды да, ләкин авылларда балалар тумый башлады, кырда тургай тавышы тынды... Кешегә хакимлек бирелгән, тик ул җаваплылыктан качарга тели... Авыл малае Марат, агрономлыкка укырга дип, шәһәргә килә һәм ялланулы үтерүчегә әверелә… Альфа-Центаврда яшәүчеләр җир халкы белән үз тәҗрәбәләрен уртаклашырга телиләр, ләкин Q планетасыннан килгән килмешәкләр дөньяны яулап алмакчылар... Шүрәле ялгызы гына тынычлап яшәргә тели, әмма аңа үсеп килүче шәһәр шаукымы комачаулый... һ.б. 

Нәрсә хакында булса да ярый. Теләсә-нинди сюжет. Теләсә-нинди тарих. Вакыйгаларның төрлечә борылышы...

Әгәр сиңа уңыш елмайса, син язган синопсис “иң яхшы”лар исемлегенә керәчәк. Ул очракта синең белән шөгыльләнәчәкләр. “Һөнәр” яшь режиссерлар фестивале кысаларында яшь драматурглар лабораториясе үтәчәк. Олег Лоевский җитәкчелегендәге тәҗрибәле режиссерлар син язган диалогардан сюжет булдырырга ярдәм итәчәк. Алай гына да түгел, синең эшең сәхнә дә уйналып каралачак. 

Заман театрын лаборатория, эскиз һәм пьеса укулардан башка күз алдына китереп тә булмый. “Һөнәр” фестивале кысаларында яшь авторларның пьесалары укыла. Бер атна дәвамында сиңа режиссер белән үз текстың өстендә эшләү мөмкинлеге бирелә. Артистлар рольләргә бүленеп синең сюжетны уйнап караячак. Бу киләчәктәге спектакльнең эскизы булачак. Аны тамашачылар караячак. Һәм алар синең язмышыңны хәл итәчәк. Куркасыңмы? Бу гадәти күренеш. Кем белә, бәлки нәкъ менә сиңа яңа Тинчурин, Исәнбәт яки Миңнуллин булу язгандыр? Эшләп карамыйча син моны белә алмыйсың. Үзеңне сынап карарга кирәк.

Текстлар 2014 елның 13 ноябренә кадәр kamalteatr@mail.ru адресына кабул ителә. “Һөнәр” фестивале кысаларында драматургия лабораториясе исә 15-21 декабрьдә үтәчәк.