12 май - Россиядә экологик белем бирү көне буларак билгеләп үтелә. Аның максаты – халыкка экологияне саклауның ни дәрәҗәдә мөһим булуын аңлату, әлеге өлкәнең кеше тормышына ни дәрәҗәдә зур тәэсир ясавы турында сөйләү.

15 апрель көнне Татарстанда санитар-экологик икеайлык башланып китте. Узган атна азагында экология һәм табигый ресурслар министры Артем Сидоров әлеге икеайлыкның якынча нәтиҗәләре белән таныштырды.

Бер ай эчендә Татарстанда җыештыру, чистартуда 400 мең кеше катнашкан. Махсус чүплекләргә барлыгы 191 мең кубометр чүп-чар чыгарылган. Калдыклар белән тиешенчә эш итмәү белән бәйле 3800дән артык хокук бозу очрагы ачыкланган. Кешеләргә, рәсми затлар һәм оешма-предприятиеләргә салынган штрафлар күләме якынча 7 миллион сум тәшкил иткән. Законсыз чүплекләргә килгәндә исә, Татарстанда барлыгы 751 шундый свалка ачыкланган, аларның 302се юкка чыгарылган.

Санитар-экологик икеайлык кысаларында үтә торган иң мөһим чараларның берсе – “Бердәм экология дәресе” акциясе. 12 май көнне уздырыла торган бу чара халыкның экологик яткан белемен күтәреп кенә калмый, ә гамәли яктан да зур кызыксыну уята. Кагыйдә буларак, республиканың төрле шәһәр һәм районнарында төрле күргәзмәләр, конференция һәм бәйгеләр уздырыла. Халык елга буйларын, парк яннарын чистарту өчен бергәләшеп өмәгә чыга, агачлар утырта.

- Республикада һәр кеше экологияне саклауның ни дәрәҗәдә мөһим булуын аңларга тиеш. Кешегә табигатьнең юкка чыгуына китерә торган сәбәпләр белән көрәшергә нәкъ менә шушы өлкәдәге белемнәре ярдәм итә дә инде. Акциянең төп максаты – халыкта экологик культура булдыру, - дип аңлаттылар безгә Татарстанның Экология һәм табигый ресурслар министрлыгында.

Татарстан Президенты Рөстәм Миңнеханов исә шушы көннәрдә узган киңәшмәләрнең берсендә әлеге кагыйдәләргә салкын караучыларның “кулларына сугарга” кирәк, дип белдергән иде.

- Табигатьне чүп-чар белән пычратучыларны ачыкларга, ә тирә-юньне чистарту эшен алга таба да дәвам итәргә кирәк, - дип белдерде ул.

“Бердәм экология дәресе”нең ничек узуы турында без Татарстанның Кама яръягы төбәгенә шалтыратып белештек. Бактың исә, республика төбәкләрендә бу акция күптән инде матур традициягә әверелгән икән.

- Бүген һәр мәктәптә махсус экология дәресләре оештырылды. Түбән Камада экология-биология үзәге бар. Алар ел саен экологиягә багышланган күргәзмә һәм фәнни-гамәли конференцияләр уздыра. Мәктәп укучылары белән дә без елга бер тапкыр гына түгел, ә берничә мәртәбә очрашабыз, - дип сөйләде безгә Экология һәм табигый ресурслар министрлыгының Түбән Кама, Сарман һәм Зәй районнарындагы идарә җитәкчесе Рафис Зәйнуллин.

Бактың исә, яшьләр арасында экологик проблемалар белән кызыксынучылар шактый икән. “Укучыларның безгә сораулары шулкадәр күп җыела ки, җавап биреп кенә җитеш”, - дип ассызыклый җитәкче.