27 апрельдән 1 майга кадәр Казанда татар теле һәм әдәбиятыннан Халыкара олимпиада узачак. Интернет-тест формасындагы сайлап алу туры былтыр декабрьдә булып, беренче турда яхшы нәтиҗә күрсәтүчеләр Казанга җыела, арада тел һәм әдәбиятны иң яхшы белүчеләр ачыклана. Олимпиаданың ачылу тантанасы 28 апрель көнне иртәнге 9да КФУның Филология һәм мәдәниятара багланышлар институтында була.

Олимпиаданы оештыручылар ачыклык керткәнчә, татар теле һәм әдәбияты буенча халыкара сынауларда Россия, Таҗикстан, Казакъстан, Үзбәкстан, Эстония, Төркия, Бельгия, АКШ, Кытай, Япония, Берләшкән Гарәп Әмирлекләре, Австралия һәм Канададан 5 меңгә якын мәктәп укучысы һәм студент катнашкан, аерым алганда, илебезнең Татарстан, Башкортстан, Чувашия, Удмуртия Республикаларыннан, Төмән, Түбән Новгород, Оренбург, Самара, Ульяновск, Сарытау, Киров, Ленинград, Мәскәү, Свердловск, Волгоград, Омск өлкәләреннән, Алтай, Красноярск, Пермь крайларыннан. Шулардан 300е беренче турдан соң Казанга килеп тагын сынау үтәргә сайлап алынган.

Татар теле һәм әдәбиятыннан халыкара олимпиадада түбәндәге сынаулар әзерләгән:

- телдән сөйләм конкурсы (чит илдән килгән катнашучылар өчен билетлар буенча);

- язма конкурс (Россия субъектларыннан килгән катнашучылар өчен);

- номинацияләр буенча иҗади конкурс (катнашучылар сайлавы буенча):

а) вокал (татар халык җырлары/татар композиторлары көе);
б) инструменталь жанр (татар халык көйләренә музыкаль композиция/татар классик-композиторы әсәрләрен фортепианода, баянда, милли гармунда, курайда, сорнайда һ.б. музыка уен коралларында уйнау);
в) хореография (татар халык биюләре/халыкчанлык стиле);
г) сәнгатьле сүз (халык эпосы/халык прозасы һәм шигърияте/әдәби-музыкаль композиция);
д) этно-дизайн;

- Олимпиадада катнашучыларның “Минем илем, минем халкым, минем уку йортым” дип аталган презентациясе.

Чыганак: http://tat.tatar-inform.ru