16-17 нче апрельдә Казанда начар күрүче балаларның “Бармак очларында дөнья” («Мир на кончиках пальцев») 1 нче Идел буе иҗади фестивале була. Гала-концертта Идел буе федераль округының 14 төбәгеннән 140 кеше катнашачак. Бу хакта бүген “Татмедиа” Республика матбугат һәм массакүләм коммуникацияләр агентлыгында үткән матбугат конференциясендә хәбәр ителде.

Фестивальнең оештыручысы “Радость детства” хәйрия фонды директоры Гүзәл Садыйкова сүзләренчә, үткән елда “Бармак очларында дөнья-2013” республика фестивале узган, ул зур уңышка ия булган.

“Быел фестивальнең чикләрен киңәйтергә һәм Идел буе төбәгенә чыгарга булдык. Ләкин безгә кайбер чикләүләр кертергә туры килде: һәр төбәктән күп дигәндә 10 катнашучы”, - дип билгеләде ул.

Үткән елның декабреннән фестивальдә катнашучылар сайлап алу турын узган. Нәтиҗәдә, оештыручылар иң яхшы номерлар белән иң яхшы башкаручыларны сайлаган.

“Быел бик сәләтле балалар катнаша. Без фестивальне конкурс буларак уздырырга планлаштырмадык, шуңа күрә балалар үзләренең иҗади мөмкинлекләрендә ярышмый – алар үзләренең сәләтләрен тамашачыга күрсәтә. Иң яхшы башкаручылар һәм коллективлар кыйммәтле бүләкләр алачак”, - дип хәбәр итте фестивальнең режиссеры Марианна Герасимова.

Балалар 7 номинациядә: “Иң яхшы уен кораллары төркеме”, “Иң яхшы уен кораллары солосы”, “Вокал”, “Иң яхшы вокаль ансамбль”, “Иң яхшы нәфис сүз”, “Иң яхшы автор” һәм “Иң яхшы бию коллективы” – үз сәләтләрен күрсәтәчәк.

“Без фестивальгә килгән шигырьләрне укып, таң калдык: балаларның шигырьләре олыларныкына охшаган. Бу балалар авыр тормыш тәҗрибәсенә ия, алар олылар кебек фикер йөртә, һәм олылар кебек акыллы, - дип ассызыклады М.Герасимова. – Мондый балаларга тирәлектә җайлашырга кыен булса да, алар бию хәрәкәтләрен өйрәнә”.

Иҗади номерларның күпчелеге патриотик юнәлештә, Россия тарихы һәм хәзерге дөнья белән бәйле, шуңа күрә фестивальнең темасы – “Минем йортым - Россия”. Фестиваль программасына Туган җиргә мәхәббәт һәм Россия геройлары турында номерлар кертелгән.

Марианна Герасимова сөйләгәнчә, чарада космонавт-сынап караучы булачак, ул “балаларны иң тормышка ашмаслык теләкләрне тормышка ашырырга рухландыра алачак”.

Шулай ук фестивальдә катнашучыларны Паралимпия уеннары чемпионы Ирина Полякова һәм ТР артистлары белән очрашу көтә. Балалар өчен Казан Кремле буйлап экскурсия һәм мастер-класслар оештырыла.

17 нче апрельдә Казанда “Ак Барс” яшьләр үзәгендә начар күрүче балаларның “Бармак очларында дөнья” («Мир на кончиках пальцев») 1 нче Идел буе иҗади фестивале гала-концерты була.

Чыганак: http://tat.tatar-inform.ru