Иртәгә, 1 нче апрель көнне, Татарстан Республикасы Милли музеенда беренче тапкыр “Су сыеры көне” узачак. Бу хакта бүген “Татар-информ” мәгълүмат агентлыгында узган видеоконференциядә музейның генераль директоры Гөлчәчәк Нәҗипова хәбәр итте. Матбугат очрашуында шулай ук ТР Милли музее директорының фәнни-тикшеренү эше буенча урынбасары Светлана Измайлова һәм Габдулла Тукай әдәби музее директоры Гүзәл Төхфәтова катнашты.

Иртәгә көтеләчәк чараны “Су сыеры” көне дип исемләү Милли музейның халык арасында “Бегемот” дип танылган сәүдә йорты бинасында урнашуы белән бәйле. Биредә беренче катта совет чорында озак еллар буе “Бегемот” кафесы эшләгән. Музейга килүчеләр “Казанский бегемот” халык кәсепләре эшләнмәләре күргәзмәсе белән таныша алачак. Шулай ук алар өчен шаян викторина, музей экспозициясе буенча балалар уен-экскурсиясе презентациясе әзерләнгән.

Гөлчәчәк Нәҗипова ассызыклаганча, “Су сыеры көне” акциясе Милли музей бинасына игътибарны җәлеп итү максаты белән дә оештырыла. Бүгенге көндә музей капиталь төзекләндерүгә мохтаҗ. Хәзерге вакытта бинаның өчтән бер өлеше генә реставрацияләнгән. Мәдәният елы кысаларында, быел бинаны яңартып кору дәвам иттереләчәк.

Музей директоры сүзләренә караганда, милли музейның талисманы да су сыеры булачак. Иртәгә шул талисманга бәйге ачыла. “Конкурста рәссамнар, халык һөнәрләре осталары һәм, гомумән, теләге булган һәркем катнаша ала. Бәйгегә эшләр ел дәвамында кабул ителәчәк. Киләсе 2015 нче елның 5 нче апрелендә, Милли музейга 120 ел тулуны билгеләп үткәндә, конкурска йомгак ясалачак”, - дип хәбәр итте гендиректор. Конкурста җиңүчегә каралган бүләккә килгәндә, Гөлчәчәк Нәҗипова сүзләреннән аңлашылганча, җиңүче дип танылган талисманны эшләтергә эксклюзив заказ биреләчәк. “Мин ышанам: киләчәктә музей ишегалдында су сыеры талисманының скульптурасы да пәйда булыр”, - дип, ул талисманның музейның күрке, бизәге булачагын әйтте.

“Музей бинасы Казанның күрке булып тора. Чит илләрдән килгән кунаклар аны “Казан Лувры” дип атый. Үзәк керү ишегеннән ул чыннан да бераз гына танылган Париж музеен хәтерләтә. Безнең музейның республика өчен әһәмиятен Лувр белән тиңләрлек. Аның коллекциясе 910 мең саклау берәмлегеннән гыйбарәт. Музей фәнни-тикшеренү, экспонатларны реставрацияләү, аларны комплектлау буенча эшчәнлекләрне алып бара. Һәр җирлектә, һәр халыкның төбәк тарихы, табигате, мәдәнияте белән бәйле коллекцияләрне туплаучы төп музее була. Татарстанда ул ТР Милли музее”, - дип бәян итте Гөлчәчәк Нәҗипова.

Чыганак: http://tat.tatar-inform.ru