Музейларга йөрергә яратмыйбыз шул. Музейчыларыбыз төрледән-төрле күргәзмәләр, чаралар, дәресләр оештырып торса да, анда йөрүчеләр саны канәгатьләнерлек дип әйтеп булмый. Музей ишеген дәүләт башында торганнар да сирәк ачып керә...

Мәдәният елына Татарстан мәдәният оешмалары җиң сызганып тотынды. ТР Мәдәният министрлыгының музей эше үсеше бүлеге башлыгы Дамир Натфуллин да музейларыбыз Мәдәният елы белән бәйле бай чараларга әзер, дип белдерә. Татарстанда барлыгы 129 музей бар. Башкалабызда урнашкан Горький, Боратынский, Ленин, Толстой ядкәрханәләрендә төзекләндерү эшләре төгәлләнеп килә. Ә татарга үтә дә якын булган Г. Тукай музеенда әле ул башланмаган да. Хәер, мәдәният министрлыгының еллык утырышында Татарстан Президенты ярдәм итәргә ышандырды.

Татарстан министрлыгы белдергәнчә, соңгы елда музейга йөрүчеләр саны арткан. 2012 ел белән чагыштырганда, 2013 тә экспозиция, күргәзмәләр аша тарих белән танышучылар 18 процентка үскән. «Тарих белән кызыксынучылар арта, тик менә музей эшчәнлеген яктыртырга теләүче журналистлар саны гына кими. Ни хикмәттер, музейларда матбугат очрашуларына коллегаларымны җыю кыенлаша бара», – ди Татарстан Мәдәният министрлыгы матбугат җитәкчесе Рузилә Мөхәммәтова.

Музей хезмәткәрләре шәхсән үзләре халыкны җәлеп итү максатыннан һәр төрле алымнар кулланып эш итә. Мәсәлән, Милли музей урынбасары Светлана Измайлова төрле шәхесләргә багышлап оештырылган укулар форматын үзгәртәчәкләрен белдерә. Ягъни укулар кемнәрнең дә булса чыгышларыннан гына түгел, ә музыкаль программалар, «түгәрәк өстәл» ,яңа экспозицияләр хакында фикер алышулардан да торачак. Үз эшенең осталары, студентлар да төрле презентацияләр дә үткәрергә ниятлиләр.

Татарстанның Милли музее ел әйләнәсендә төрледән төрле акцияләр оештыру белән мәшгуль. Хәзерге вакытта да «Татарстанның музей язы» акциясенә әзерләнәләр. «Музей коллекцияләре берләштерә» дип исемләнгән проектта республика һәм Казан музейлары берләшәчәк. Мондый эчтәлекле акцияләр Россиядә, чит илләрдә еш үткәрелә. Музей коллекцияләрен җәмгыятьтә танытуга, популярлаштыруга, шулай ук, эчке туризмны җәелдерүдә дә мөһим.

«Соңгы елларда музейга килүчеләр саны чыннан да сизелерлек артты. Агымдагы елның ике аенда аеруча мәктәп яшендәге балалар актив йөрде. Россиянең төрле шәһәрләреннән дә килүчеләр җитәрлек. Залларыбыз буш тора дип әйтә алмыйбыз, чөнки без һәрвакыт нинди дә булса кызыклы проектлар уйлап табып эшлибез. Студентлар өчен дә аерым акцияләр узып кына тора. Әле менә «Май чабу» бәйрәмнәрен гөрләттек. Халык андый чараларны аеруча ярата», – дип хәбәр иттеләр Intertat.ru газетасына Милли музейның матбугат үзәгеннән.

Чыганак: http://www.intertat.ru/tt