Быел Яңа ел яллары 8 көн­гә сузылачак. 1-8 гыйнвар – ял көннәре. Ял көннәрен респуб­ликаның ис­тәлекле урыннарында үткә­рергә те­ләү­­­челәр өчен кыскача күзәтү тәкъдим итәбез.
Күңелле яллар көтсен безне!

Болгар

Яңа ел яллары өчен әзер­ләнгән махсус экскурсияләр 2 гыйнвардан башлана. Кунак­лар өчен ике төп маршрут әзер­­­ләнгән. Беренчесе – “Бол­гарның кышкы легендасы”. Аңа шәһәрлектә урнашкан барлык 4 музейны һәм тарихи объектларны карау, шул исәп­тән дөньядагы иң зур Коръәнне күрү, Икмәк музеенда яңа пеш­кән кайнар ипидән авыз итү дә керә. Экскурсияләр тә­мам­лан­ган­нан соң ат чанасына утырып йөрергә, Яңа ел чыршысы янында кышкы уеннарда катнашырга мөмкин булачак. Икенче маршрут исә балалар өчен дә, олылар өчен дә кызык­лы булыр дип ышандыралар. Туган як музее хезмәт­кәрләре кунакларга элек Яңа елны һәм Раштуаны ничек каршы алуларын сөйләячәк, иске чыршы бизәкләрен күр­сәтәчәк. Балалар өчен Кыш бабай ос­таха­нәсе эшләр дип көтелә. Әлеге маршрутны сайлаучылар да соңын­нан чанага утырып йөри һәм чыршы тирә­сендә күңел ача алачак.

Туристик агентлыклар тәкъ­дим иткән тур­ла­р­­­ның бәяләре 2000 сумнан башлана. Үз транспортың яки маршрут автобусы белән дә барып җитәргә мөмкин. Автобуслар Казан автовокзалыннан 9.00 сәгатьтә һәм 17.00 сәгатьтә кузгала. Болгардан Казанга автобуслар 5.30да һәм 14.00 сәгатьтә юлга чыга. Билет бәясе – 305 сум. Шәһәр­лек терри­ториясендә кунак­ханә эшли. Болгар музейларына билетлар 30 сумнан 460 сумга кадәр тора. Сайты – www.bolgar.info.

Свияжск

Биредә 20 декабрьдә даими күргәзмәнең беренче өле­ше ачылу көтелә. Ул Сви­яжс­киның XVI-XVII гасырлардагы тарихына багышланган. Гыйнвар башында “Свияжски­ның изге яклаучылары” дип аталган күргәзмә дә ачыла. Ул ут­рау­дагы борынгы гыйба­дәт­ханәләр, изгеләр белән таныштырачак. Төп ишегалдында 2-7 гыйнвар көннәрендә 12.00 һәм 14.00 сәгатьтә халык уеннары оештырыла. 30 декабрьдән 9 гыйнварга ка­дәр 13.00 сәгатьтә һәм 16.00 сәгатьтә Раштуа мәй­данында урта гасырлар чорын чагылдырган тамашаны карарга, баһадирлар орышында катнашырга, ук атарга, ат чанасына утырып яки атка атланып йөрергә мөмкин булачак. Тир һәм җирле осталарның яр­минкәсе дә эшләр дип көтелә. Чараларга олылар өчен билет бәяләре 100 сумнан башлана. Туристик агентлыклар аша Свияжскига кимендә 900 сумга барып кайтырга мөм­кин. Шулай ук үз транспор­тыңда яки электричкада барырга була. Тулырак мәгълү­матны www.ostrovgrad.org сайтыннан белергә мөмкин.

Кыш бабай резиденциясе

Ул Арча районы Кырлай авылында Габдулла Тукай музее янында урнашкан. Монда балалар өчен дә, өлкәннәр өчен дә кызыклы булырдай 4 сә­гатькә сузылачак интерактив уен – квест тәкъдим ителә. Уен барышында серне чишү өчен Шүрәле һәм башка әкият персонажлары, Кыш бабай, Кар кызы белән очрашырга, кечкенә спектакльдә катнашырга, кулдан уенчыклар ясарга кирәк булачак. Биредә ат чанасына утырып йөрер­гә, чанада, тимераякта шуарга да мөмкин. Шәхси транспортта килүчеләр өчен билет бәясе балаларга – 750, өлкән­нәргә – 1500 сум, Казаннан оешма автобусында алып ки­лү балалар өчен – 1100, өл­кәннәр өчен 1850 сум тора. Сайты – www.tatar-moroz.ru.

Казан Кремле музейлары

10 декабрьдән “Пушечный двор” күргәзмә залында “Шәм­нәр, гирляндалар, гү­зәл чыршы...” дигән күргәз­мәгә килеп, элек бәйрәмне ничек уздырулары, нинди бү­ләкләр бирү­ләре белән танышырга мөм­кин. Ислам мә­дә­нияте музеенда 20 декабрь­дән 5 гыйнварга кадәр балалар өчен Һиҗри мотивларына нигез­ләнгән квест оештырыла. Казаннан – Мәккәгә, Мәк­кәдән Мәдинәгә сәяхәт кылырга тәкъдим ителә. Би­редә нәни­ләрне шәмаил ясарга да өйрәтәчәкләр. 19 декабрьдән “Манеж” күр­гәзмә үзәгендә балалар өчен “Анимация тылсымы” күргәз­мәсе эшләячәк. Чит ил һәм Россия мультфильмнары би­зәлешләренең фрагментлары, анимация җиһаз­лары һәм Мәскәү анимация музееннан китерелгән башка кызыклы экспонатлар белән танышырга мөмкин. Табигать белеме музеенда галәмнең спутниктан төшерелгән рә­сем­нәрен телескоп аша кү­рергә, космик үлчәүгә басып, үзеңнең башка планеталардагы авыр­лыгыңны белергә, Татарстан территориясендә без­гә кадәр кемнәр яшәве белән танышырга була.

Кремль музейларында балалар өчен башка кызыклы остаханәләр дә узачак. Балаларны җитен­нән, кәгазьдән, үзле балчыктан Яңа ел уенчыклары ясарга өйрәнергә, табышмакларга җавап табарга, кызыклы тәҗ­рибәләрдә катнашырга чакыралар. Билет бәясе 50 сумнан башлана. Тулырак мәгълүмат www.kazan-kremlin.ru сайтында. Кремль музейлары хәзер җомга көннәрендә 12.00 сә­гатьтән 21.00 сәгатькә кадәр эшли.

Габдулла Тукай музее

25-28 декабрь көннәрендә балалар өчен кызыклы викториналар уза. Биредә нәниләр Шүрәле, Кыш бабай белән очрашып, аларның сорауларына җавап бирәчәк, бала­ларның Тукай шигырьләрен никадәр яхшы белүләрен дә тикшерәчәкләр. Сайты: www.tatar.museum.ru/Tukay/

Чыганак: http://vatantat.ru