Буа шәһәрендәге Роальд Сәгъдиев исемен йөртүче мәктәптә төгәл фәннәрне сөюче шигъри күңелле балалар укый дисәк, ялгыш булмас, мөгаен. Чөнки мәктәп атаклы якташлары – Татарстан һәм Россия Фәннәр Академиясе әгъзасы, Американың Мэрлин университеты профессоры исемен йөртә. Шушы ук мәктәптә оешкан Татарстанның халык шагыйре Ренат Харис музее исә балаларны шигърияткә якынайта.

Укучылар атаклы якташларының портретын да оста ясый

Гади генә түгел, музей-картиналар галереясы да әле ул. Чөнки биредә Ренат Ха­рисның утыз алты картинасы саклана. Музей җитәкчесе, Татарстанның атказанган укы­тучысы Гөлнур Айзетуллова әйтүенчә, музей оештыруга нәкъ менә шушы картиналар сәбәпче булган.
– 2001 ел иде ул. Ренат Харис 60 яшьлек юбилеен бәйрәм иткәндә Буа районына дип шушы картиналарны бүләк итте. Бу бүләк безнең мәктәпкә тапшырылды. Чөн­ки атаклы якташыбыз Луначарский исемен­дәге мәктәп­не тәмамлаган.

Әлеге мәктәп яңа бинага күчкәч, музейга аерым бүлмә бирелгән. Экспонатлар җыю белән беррәттән, Гөлнур Айзетуллова Ренат Харис шә­хесе үрнәгендә районның яшь талантларын үстерү турында да уйлана. Бу хакта ул шагыйрьнең үзенә дә әйтә. Ренат Харис исә ул вакытта туган ягына кунакка Башкортстан шагыйре Мостай Кә­римне алып кайткан була һәм кадерле кунак алдында, якташларым өчен үз исемем­дәге премияне булдырачакмын, дип вәгъдә итә. Әлеге премия алдан академик Сәгъ­диев мәктәбе укучыларына гына бирелсә, соңын­нан районның укуда, сән­гатьтә уңышларга ирешкән балаларына да тапшырыла башлый.

Музейда Ренат Харис һәр яклап ачыла. Биредә аны күренекле якташ, шагыйрь, дәүләт эшлеклесе буларак та күрсәтә алганнар. Һәр картинага эпиграммалар язылган. Кыс­ка шигырьләрне русчага Лилия Газизова тәрҗемә итсә, инглизчәгә тәрҗемәне Равил Бохараев ясаган булган. Экспонатлар арасында Ренат Харис­ка аеруча якын булганнары да бар. Әйтик, аның 1958 елда класс белән төшкән күмәк фотосы үзендә дә сак­ланмаган. Бу фотоны Гөлнур ханым мәктәп архивыннан алган.

Музейдан кеше бер дә өзелми. Башка музейлар халыкны ничек җәлеп итәргә дип баш ватса, монда ничек барысына да вакыт җитке­рергә дип уйланалардыр, мөгаен. Кунак­лар өчен те­ләкләр журналын ачсаң, музейда Татарстаннан гына түгел, чит ил вәкилләре дә булуы күренә. Америка студентлары, мәсәлән, биредәге ихласлыкка, тәрбия алымнарына сокланып киткән.

Сокланып кына калмыйлар, өйрәнәләр дә. Ник ди­гәндә, Гөлнур Айзетуллова сигез район укытучылары һәм укучылары өчен Ренат Харис исемендәге фәнни укулар оештырган. “Катнашучылар көне буе ярышты, жюрида Ренат абый белән хәләл җефете Лилия апа да утырды”, – ди Гөлнур Айзетуллова.
Бу мәктәпнең тарту көче андагы мөгаллим-остаз­лар­ның ихласлыгындамы икән әллә? Шулайдыр. Әнә шул ихласлыклары, Буадан чыккан шәхесләр белән горурланып, алар үрнәгендә яшь буынны тәрбияләүләре Роальд Сәгъ­диевне дә сокландыргандыр. Ул да бит җае чыккан саен Буага кайтып, шушы мәктәпкә кагылмыйча калмый. Ә сик­сән яшьлеген билгеләп үт­кәндә, мәктәпнең берничә укытучысын һәм физика фәне буенча алдынгы укучыларны Мәскәү­дәге космик тикше­ренүләр институтына чакыра һәм балаларга ноутбук бүләк итә.

Буа халкы үзенең талантлы улларын һәм кызларын элек тә зурлаган. Бүгенге көндә сакланып калган тарихи биналар, мәчетләр, музейлар, данлы якташлары исемен йөрткән мәктәпләр, урамнар булу яшь буынга тәрбия бирү чыганагы да.Әлеге очрашудан без дә тарихи мирасның замана балаларына тапшырылачагына ышанып кайттык.

Чыганак: http://vatantat.ru