Быел Татарстанда 36 меңнән күбрәк бала беренче сыйныфка укырга керәчәк. Аларның 6 меңнән артыгы халык ярдәменә мохтаҗ. Нәниләргә булышу йөзеннән республикада 6 ел дәвамында «Мәктәпкә җыенырга ярдәм ит!» акциясе уздырыла.

Акцияне үткәрү дәвамында барлыгы 105 меңнән артык беренче сыйныф укучысына 75 миллион сумлык ярдәм күрсәтелгән. Чарада 500дән артык коммерция оешмасы һәм 300 тирәсе артык шәхси эшмәкәрләр катнашкан. Узган ел «Мәктәпкә җыенырга ярдәм ит!» акциясендә 20 меңнән артык беренче сыйныф һәм 10 меңгә якын 2-11 сыйныф укучысына махсус ярдәм күрсәтелгән. Җыелган акчаның гомуми күләме исә 17,5 миллион сум тәшкил иткән.

Быел бу акция узган атна ахырында башланып китте. Аңа стартны Татарстан Президенты шәхсән үзе бирде. «Һәрбер бала беренчел белемнәрне мәктәптә туплый. Алар анда барысы да бертигез булырга тиеш. Барлык әти-әниләр дә балаларын тиешле уку әсбаплары белән тәэмин итә алмаганга гына, аларны бүлеп карау ярамый», - дип билгеләп үтте Рөстәм Миңнеханов үзенең чыгышында.

Чыннан да, әлеге акциянең төп максаты - нәкъ менә ярдәмгә мохтаҗ гаиләләргә ярдәм күрсәтү. Күпбалалы, әти-әниләре эшсез яки инвалид булган гаиләләргә, беренче сыйныфка баручы мөмкинлекләре чикле балаларга, ятим калган нәниләргә аеруча зур игътибар биреләчәк. Башка еллардагы кебек үк, быел да беренче сыйныф укучыларына гына түгел, ә башка югарырак классларда белем алучыларга да ярдәм кулы сузарга планлаштыралар. Булышуга мохтаҗ андый укучылар саны якынча 2 мең.

Балаларга бүләк ителәчәк мәктәп сумкалары традицион рәвештә дәфтәрләр, каләм һәм карандашлар, хезмәт һәм рәсем дәресләре өчен кирәк-яраклар белән тулыландырылачак. Әле алай гына да түгел, әгәр дә кирәк дип табылса, комплектка мәктәп тарафыннан билгеләнгән махсус форма да өстәлә.

Шунысын да билгеләп үтү кирәк, акциядә төрле оешма-предприятеләр һәм шәхси эшмәкәрләр генә түгел, ә гади халык та катнаша ала. Моның өчен акчаны түбәндәге хисапка юлларга кирәк.

Благотворительный фонд АК БАРС СОЗИДАНИЕ»
ОГРН 1061600052425
ИНН/КПП 1658079690/165701001
р/с 40703810100020000999 в ОАО «АК БАРС» БАНК
БИК 049205805
корреспондентский счет 30101810000000000805
назначение платежа «Помоги собраться в школу»

Тулырак мәгълүматны (843) 519-38-53 телефонына шалтыратып, «АК БАРС СОЗИДАНИЕ» хәйрия фондыннан алырга мөмкин.

Чыганак: http://www.intertat.ru