Татар мәгарифе порталы
Сез монда
Шушы көннәрдә В.И.Ульянов-Ленин исемендәге Казан дәүләт университеты 2007-2008нче уку елының иң шәп академик төркемен билгеләде, дип хәбәр итә КДУ матбугат үзәге. Бу чара быел инде өченче тапкыр уздырыла.
Гадәттәгечә, бәйге өч турда үткән. Иң элек факультет эчендә сайлап алу этабы оештырыла. Студентлар курсның фәнни һәм иҗтимагый эшчәнлеген үзенчәлекле итеп тәкъдир итәргә тиеш булган. Алга таба коелып калмаганнарны чираттагы сынау көтә – “Университет – безнең йорт” исемле проект әзерләү. Биредә университетны нинди итеп күрәселәре килә, киләчәктә нинди үзгәрешләр кертерләр иде – шуны күрсәтергә кирәк булган.
Нәтиҗәдә, финалга 16 группа эләгә. Бу – 8 югары һәм 6 кече курс студентлары. Арада КДУның 10 факультеты һәм Яшел Үзәндәге филиалы бар. Мехмат, филфак һәм ВМК студентлары иң активлары булган. Алар һәр номинациядә берешәр төркем тәкъдим иткән.
Журналистика һәм социология факультеты деканы Васил Гарифуллин башка факультет җитәкчеләренең уртак фикерен җиткергән: “Бу университетта уздырылган конкурсларның иң яхшысы. Тагын 10-15 елдан группадашларыгыз белән очрашу да зур бәйрәмгә әвереләчәк”.
Алга таба укыту эшләре буенча проректор Владимир Бухмин җиңүче-төркемнәрнең исемнәрен, дөресрәге номерларын атады.
«Кече курслар арасында 2007-2008нче уку елының иң яхшы академик төркеме” исемен түбәндәге “бәхетлеләр” алды:
- 1нче урын – фәлсәфә факультетының 1861нче төркеме;
- 2нче урын – ВМК факультетының 62нче "э" төркеме;
- 3нче урын - филология факультетының 1073нче төркеме.
«Фәнни-тикшеренү эшчәнлегендә актив катнашу” номинациясендә җиңүне механика-математика факультетының 565нче төркеме яулады. «Группаны иң шәп тәкъдир итүче” исемен журналистика һәм социология факультетының 1363нче төркеме ала.
«Университетның спорт һәм массакүләм мәдәни чараларында актив катнашкан” төркем итеп биология-туфрак факультетының 174нче төркеме билгеләнгән.
«Югары курслар арасында 2007-2008нче уку елының иң яхшы академик төркеме” исемен алучылар:
- 1нче урын – А.М. Бутлеров исемендәге Химия институтының 743нче төркеме;
- 2нче урын – татар филологиясе һәм тарих факультетыннан 1142нче төркем;
- 3ече урын – тарих факультетыннан 444нче төркем.
“Университет – безнең йорт” пректлары арасында иң шәбен филология факультетының 1057нче төркеме әзерләгән. Яшел Үзән шәһәрендәге филиалның гуманитар факультеты (1156) “Иң актив катнашучы” исемен ала. «Фәнни-тикшеренү эшчәнлегендә актив катнашу” номинациясендә беренчелекне география һәм экология факультетының 234нче төркеме, ә «Группаны иң шәп тәкъдир итүче” исемен ВМКның 958нче төркеме яулый.
«Казанский университет» газеты баш мөхәррире Роза Иванова, үз чиратында, “2008 елда иң шәп материал” номинациясе җиңүчесен билгеләгән. Бу – механика-математика факультеты студентлары (551нче төркем.
Беренче урын яулаган группаларны Санкт-Петербург шәһәренә сәяхәт көтә.
- Караулар саны: 2957
- Бастыру