Өч атна буе Сингапур белгечләре Казан укытучыларына дәрес алып баруның яңа методикаларын өйрәтәчәк. Әлеге курсларны 240лап укытучы үзләштерә.

Курслар Татарстан Президенты кушуы буенча Сингапурның “Educare” компаниясе белән берлектә оештырылган. Аларны Татарстан мәгарифен үстерү стратегиясен тормышка ашыру кысаларында уздырлар. Казанның 11 мәктәбе укытучылары өч атна буе әлеге дәресләрдә катнашып, квалификацияләрен арттыру турында халыкара сертификат алып чыгачак.

Курслар инде берничә ел рәттән уздырыла. Татарстан Мәгариф һәм фән министрлыгы биредә катнашачак мәктәпләрне сайлый, ә мәктәпләр үз чиратында - укытучыларны. Биредә өйрәнгән методиканы укытучылар үзләре теләгән дәресләрдә куллана алачак.

Белгечләр исә укытучыларны өч төрле методикага өйрәтә. Бер методика белән таныштыруга бер атна бүлеп бирелгән. Шуларның беренчесе - балаларны бергә эшләргә өйрәтү (монда, мәсәлән, парталарны да укучылар бер-берсен күрсен өчен махсус төзеп, дәресне җанлы итеп алып бару карала). Икенчесе - укучыларда тәнкыйди фикерләүне булдыру һәм өченчесе - балаларны төрле мәсьәләләр чишәргә өйрәтү.

Шуны искәртеп китәргә кирәк: сүз дәресне яңа ысул белән алып бару турында түгел, ә дәрес программасын балалар яхшырак үзләштерсен өчен башка төрле методикалар кулланып укыту турында бара. Казанның 19 нчы гимназиясенең татар, инглиз, төрек телләре укытучысы Индир Халиков биредә өйрәнгән методиканы ел дәверендә дәресләрендә дә кулланган. Әлеге дәресләрне укытуны алуп баручы Сингапур компаниясе вәкиләре дә караган.

“Бу методикаларны куллану яхшырак яки начаррак дип әйтеп булмый. Чөнки төрле буын мәгълүматны төрлечә үзләштерә һәм һәр буынга үз методикасы кирәк”, - дип саный Индир Халиков.

Сингапурның “Educare” компаниясе белгечләре бу методикаларны дөньяның төрле илләрендә өйрәтә. Дәресләр инглиз телендә алып барыла, шуңа да лекцияләрдә тәрҗемәчеләр дә катнаша.

Чыганак: http://intertat.ru/tt