Бүген Татарстан Республикасы Дәүләт Советында узган “Татарстан Республикасында милли мәгариф: аның торышы һәм перспективалары” дип аталган “түгәрәк өстәл” утырышында республикада яшәүче бөтен милләт халыкларын бер өстәл артына җыеп, туган телдә белем бирү буенча проблемалар турында сөйләшү белән тарихка кереп калыр. Анда Татарстан Республикасы Президентының Эчке сәясәт мәсьәләләре буенча идарә башлыгы Александр Терентьевның катнашып, проблемага карата фикерен белдерүе милли мәгариф мәсьәләләренең югарырак баскычка куелуын күрсәтә.

Мәдәният, фән, мәгариф һәм милли мәсьәләләр комитеты рәисе Разил Вәлиев белдергәнчә, милли мәгарифкә генә түгел, гомумән, бөтен мәгариф системасына кагылышлы мәсьәләләр көн үзәгендә тора. Милли мәгариф мәсьәләләре гамәлдәге законнар буенча көйләнсә дә, проблемалар кала бирә. Чөнки законнар тулысынча тормышка ашырылмый. Татарстан Республикасы Дәүләт Советына мәктәпләрне үзгәртеп коруга (бөтенләй ябу яки тугызъеллыкка яки башлангычка әйләндерү) кагылышлы мөрәҗәгатьләр дә күпләп килә. Р. Вәлиев Татарстан Республикасы Президентының Татарстан Республикасы Дәүләт Советына Юлламасында һәр торак пунктта башлангыч мәктәпләрне саклап калу бурычы куелганлыгын да әйтеп үтте.

Бүген “түгәрәк өстәл” утырышында сүз күбрәк уку-укыту процессын оештыру, милли мәктәпләрне туган тел һәм әдәбияттан дәреслекләр белән тәэмин итү, икенче буын федераль дәүләт белем бирү стандартларын гамәлгә кертү шартларында уку процессын оештыру, рус телле балаларда татар теленә кызыксыну тудыру турында барды. Беренче буын дәүләт стандартлары буенча укучыларны татар теле һәм әдәбияты дәреслекләре белән тәэмин итү ниндидер бер дәрәҗәгә куелган булса, мәсәлән, удмурт мәктәпләре үз туган телләрен өйрәнү буенча дәреслекләргә кытлык кичерә, мультимедияле чаралар турында әйтеп тә торасы юк.

Утырышта шулай ук 309 нчы федераль закон кабул ителгәннән соң эшләнгән татар теле һәм татар телендә язылган дәреслекләренең РФ Мәгариф һәм фән министрлыгының грифын алырга тиешлеге, әлегә моның механизмы булмавы билгеләп үтелде. Шулай ук хәзерге вакытта дәреслекләрне лицензиясе булган аерым нәшриятлар гына чыгара алуын, ә Татарстан китап нәшриятының андый лицензиясе булмавы әйтелде. Бу уңайдан “түгәрәк өстәл”дә катнашучылар Татарстан Республикасы Министрлар Кабинетына федераль дәүләт хакимияте органнары белән татар теле һәм татар телендә язылган дәреслекләрне рецензияләү һәм бастыру системасын билгеләү һәм килештерү нисбәтеннән мөрәҗәгать итәргә йөкләмә бирде.

Чыганак: http://tatar-inform.ru