11 апрель көнне Марат Мөлеков исемендәге татар иҗтимагый үзәге Казан федерал университеты базасында татар филологиясе һәм тарихи институты ачуны таләп итеп пикетка чыга. Казан дәүләт университеты җирлегендә федерал университет оештырганда, җитәкчелек татар филологиясе һәм тарихы институты булачак, дип белдергән иде. Әмма университет җитәкчелеге филология һәм сәнгать институты булдырып, аның эчендә татфакны кафедра итеп кенә калдырырга җыена. Татар зыялыларының чишмәсе булган татфакны юкка чыгаруга җәмәгатьчелек риза түгел.

Алар Казан федераль (Идел буе) университеты һәм татар дәүләт гуманитар-педагогика университетының татар филологиясе факультетларын берләштереп, татар филологиясе һәм тарихы институтын ачуны таләп итә.

Университетның элекке ректоры Мәгъзүм Сәләхов 2009 елда: “Һичшиксез, университетта татар филологиясе һәм тарихы институты булдырылачак. Ул хәзерге татар дәүләт гуманитар-педагогика университеты бинасында урнашачак. Бинаның диварына без зур хәрефләр белән татар институты дип язып та куячакбыз”, дигән иде.

Әмма Сәләхов үзе дә ректоры булып калмады, сүзләре дә җилгә очты. Аның урынына Алабуга башлыгы Илшат Гафуров билгеләнде. Милли җәмәгатьчелек аның гуманитар өлкәгә, милли юнәлешкә игътибар бирмәвеннән зарлана.

Пикет 11 апрельдә, сәгать 11дә, Ленин һәйкәле янында уза. Урам җыенына татфакта белем алган зыялылар чакырылган.

Чыганак: http://www.tatartime.com