Өлкән сыйныфлар өчен яңа федераль дәүләт белем бирү стандартлары җәмгыятьтә зур бәхәсләр тудырды. Предметларны өч дәрәҗәдә өйрәнүне күздә тоткан проект күпләрне борчуга салды. Мәҗбүри өйрәтелә торган предметлар итеп бары тик 4 фәнне – физкультура, тормыш иминлеге нигезләре, “Россия дөньяда” һәм шәхси проект әзерләүне генә калдыру акылга сыймаслык хәл, дип чаң сукты укытучылар һәм ата-аналар.

Россия Федерациясе мәгариф һәм фән министры Андрей Фурсенко җәмәгатьчелекне тынычландырырга ашыкты. Аның сүләренчә, өлкән сыйныфлар өчен федераль белем бирү стандарты проектында мәҗбүри предметлар саны кимендә 10 дип билгеләнгән. Шуларның дүртесе - физкультура, ОБЖ, “Россия дөньяда” һәм шәхси проект әзерләү барлык укучылар өчен мәҗбүри булачак, аларны өйрәнү күләме барлык укучылар өчен дә бертөрле, дип аңлатма бирә ул.

Калган мәҗбүри предметларны үсмер 6 блоктан үзе сайлап алачак. Шулай итеп, беренче төркемдә рус теле һәм әдәбияты, шулай ук туган тел һәм әдәбияты булачак. Икенче төркемгә чит телләр, өченчегә – математика һәм информатика өлкәсенә караган фәннәр, дүртенчегә – иҗтимагый фәннәр, бишенче төркемгә – табигый фәннәр, алтынчыга – сәнгать яки сайлау буенча предмет кертегән. Һәрбер төркемнән укучы берне яки икене сайлап алырга мөмкин, әмма нәтиҗәдә, предметлар саны 7дән артмаска тиеш. Шулар исәбеннән 3-4 предметны үсмер тирәнтен өйрәнәчәк. Мондый фәннәр укучы тарафыннан булачак һөнәрен күздә тотып сайлана.

9 февраль көнне Россия Федерациясе Дәүләт Думасында мәктәптә яңа белем бирү стандартларын кертү мәсьәләсе хакында фикер алышу булды. Доклад белән чыгыш ясаган Андрей Фурсенко стандартлар әле эшләнеп бетмәгән һәм аларга һичшиксез төзәтмәләр кертеләчәк дип белдерде. Җәмәгатьчелектә яклау тапкач кына проект кабул ителәчәк дип ышандырды ул.

Чыганак: http://intertat.ru