Бүген Татарстан Республикасы Дәүләт Советы Рәисе Фәрит Мөхәммәтшин Алабуга дәүләт педагогика университетында булды.

Визит вакытында аңа электрон китапханә, телевизион мәгариф каналы, ресурс үзәге, интеллектуаль лагерь, “күпмилләтле Алабуга” проекты һ.б. тәкъдим ителде. Шулай ук биредә августта узган мәктәп укытучылар фестивале турында сөйләделәр. Вуз ректораты парламент башлыгыннан бу чарага бөтенроссия статусын бирүдә ярдәм итүен сорады.

Вузның актлар залында парламент дәресе узды, аны Дәүләт Советы Рәисе алып барды. Мондый дәресләр бөтен республика буенча парламент, Мәгариф һәм фән министрлыгы инициативасы буенча үткәрелә. “Мин беренче тапкыр мондый рольдә чыгыш ясыйм – ачык дәрес алып барам. Нигә нәкъ менә Алабугада, педагоглар коллективы алдында? Мин шәһәргә 1 сентябрьдә киләм дидем, әмма килә алмады. Икенчедән, быел Укытучы елы. Укытучыларны киләчәктә көндәшлелеккә сәләтле, инновацион үсеш мәсьәләләрен хәл итәргә сәләтле укучылар әзерли алсыннар өчен укытырга кирәк”, - диде Фәрит Мөхәммәтшин.

Аның лекциясе тормышның төрле аспектларына – муниципалитетларның вәкиллекле органнарына сайлаулар, мәктәптә һәм вузда белем бирү дәрәҗәсе, демократик үсеш мәсьәләләренә кагыла иде. Соңыннан парламент башлыгы студентларның сорауларына җавап бирде.

Чыганак: http://tat.tatar-inform.ru