5-6 апрель көнне башкалабызда программалау буенча тагын бер бәйге узачак. Бу – VIII Татарстанның мәктәп укучылары һәм студентлары арасында программалау буенча ачык команда турниры. Турнир А.Н.Туполев исемендәге Казан дәүләт техник университеты базасында уздырыла.

Биредә Татарстан Республикасының югары уку йортлары студентлары, урта мәктәп, лицей һәм гимназия укучылары катнаша ала. Бу – командалы турнир, шәхси зачет түгел. Команда бер үк уку йорты студент-укучыларыннан җыелырга тиеш. Ләкин командагызга башка мәгариф оешмаларыннан әгъзалар аласыгыз килә икән, оештыру комитетыннан рөхсәт алып була. Бу очракта, хәтта Россиянең башка регионыннан килгән командалар да көч сынаша алачак.

Турнир ике турда узачак. Беренчесе – күнекмә максатыннан. Икенчесе – төп. Һәр команда куллануга компьютер алачак. Биредә 3-4 сәгать аралыгында 6дан 12гә кадәр мәсьәлә чишәргә туры киләчәк. Беренче турга якынча 4, икенче турга 5 сәгать вакыт бирелә.

Бәя бик җиңел ясалачак. Шарт – көндәш командаларга караганда булдырга алганча күбрәк күләмдә мәсьәлә чишү. Әлбәттә, аларның чишелеше мантыйкка туры килергә, җавабы дөрес булырга тиеш. Әгәр инде ике яисә берничә команда бертигез күләмдә эш башкара икән, җиңүче өстәмә вакытта билгеләнә.

Бәйге ахырында җиңүчеләрне I, II, III дәрәҗәле дипломнар һәм «ICL-КПО ВС» ААҖ тарафыннан кыйммәтле бүләкләр көтә.

Мәгълүмат өчен:
Артамонов Анатолий Викторович, e-mail ava@icl.kazan.ru, тел. (843) 272-81-71
Хафизова Светлана Фердинантовна, e-mail ksf@icl.kazan.ru, тел. (843) 279-51-16
Р.S. Турнирда бары тик сайлап алу турын узган командалар гына катнаша ала.