Россия мәгарифенең төп проблемасы дәүләт акчалары нәтиҗәле итеп кулланылмауда һәм мәктәпләрдә пенсия яшендәге укытучылар саны күп булуда, дип саный РФ вице-премьеры Сергей Иванов. Ул мондый фикерне 19 мартта узган РФ Мәгариф һәм фән министрлыгы коллегиясе утырышында әйтте.

«Бүлеп бирелгән акчалар адреслы, рациональ һәм нәтиҗәле итеп тотылырга тиеш. Шулай ук бу өлкәнең күптәнге «авырткан» җире – кадрлар җитешмәү проблемасы. Бүген мәктәпләрдә элеккегечә пенсионер-мөгаллимнәр укыта бирә», - дип билгеләде Иванов.

Вице-премьер быел мәгариф системасына һәм инновацияләргә бюджеттан илнең тулаем эчке продукты күләменең 4,4 проценты сарыф ителәчәген искә төшерде. Ә бу илне саклауга тотылган чыгымнардан да күбрәк. Әмма акчаларны сарыф итү нәтиҗәлеге түбән булып кала бирә, дип билгеләде ул. Аның сүзләренчә, укытучы хезмәтенең абруен күтәрү үз актуальлеген югалтмый һәм хөкүмәт өчен өстенлекле мәсьәлә булып санала. Әлегә педогогик югары уку йортларын тәмамлаучылар мәктәпләргә барырга ашыкмый. Сергей Иванов сүзләренчә, бары мөгаллимгә укыган яшьләрнең бары 5 проценты гына һөнәре буенча эшли.

«Тиешле дәрәҗәдәге хезмәт хакы, классларда заманча технологияләр, үз квалификацияңне даими рәвештә күтәрү мөмкинлеге – болар барысы укытучылар потенциалын үстерү һәм яшьләрне мәктәпкә китерү юнәлешендә эшләргә тиеш», - диде вице-премьер.

Чыганак: http://www.intertat.ru