Казанда узган татар теле һәм әдәбиятыннан Бөтенроссия олимпиадасында быел 80 нән артык IX-XI сыйныф укучысы катнашты. Алар үзләренең өлкәләрендә (республикаларында) инде беренчелекне яулаган булганнар һәм хәзер үз белемнәрен Россия күләмендә сынап карарга җыелганнар иде. Олимпиадада катнашу өчен укучылар шулай ук Башкортостан, Марий Эл, Удмуртия, Чувашия, Мордовия республикаларыннан, Пермь, Самара, Киров, Чиләбе, Ульяновск, Курган, Свердловск, Оренбург, Төмән, Мәскәү өлкәләреннән килделәр.

Ә инде призлы урыннар быел Саратов өлкәсе кызларына тәтеде. Саратов шәһәренең татар гимназиясендә белем алучы Рената Тугушева (XI сыйныф) һәм Лилия Ягудина (IX сыйныф) татар теле һәм әдәбиятын башкаларга караганда яхшырак белүләрен расладылар.