Әлеге республикакүләм (региональ) турнир «ICL-КПО ВС» ачык акционерлык җәмгыяте һәм Татарстан Республикасының Мәгариф һәм фән министрлыгы тарафыннан инде күп еллар дәвамында оештырылып килә. Оештыру эшләренә быел Казан дәүләт университеты белән А.Н. Туполев исемендәге Казан дәүләт техник университеты да кушылды. Шуңа күрә 5-6 апрельдә әлеге конкурс КДТУның 7нче бинасында оештырылачак (Казан шәһәре, Зур Кызыл урамы, 55).

Турнирда Татарстан Республикасы мәктәпләре (гимназияләре, лицейлары һ.б.) укучылары, вуз студентлары катнашырга хокуклы. Турнирда командалар гына катнаша ала. Команда 3 кешедән торырга тиеш һәм ул бары тик бер үк мәктәп эчендәге укучылардан яисә факультет эчендәге студентлардан гына оеша ала. Җыелма командалар билгеле бер таләпләргә туры килгәндә генә оештыру комитеты рөхсәте булганда катнаша ала. Җыелма командалар Россиянең башка регионнарындагы студентлар (укучылар) тарафыннан да төзелергә мөмкин. Турнир ахырында шәхси урын билгеләнми, бары тик командаларга гына урын бирелә.

Турнир ике өлештән тора (тренировка өлеше һәм конкурс үзе). Һәр командага бер компьютер бирелә. Тренировка өлешендә командаларга 3-4 сәгать эчендә 6 дан алып 12 гә кадәр мәсьәлә бирелергә мөмкин, төп өлешендә мәсьәләне чишү өчен 5 сәгать бирелә. Әлбәттә, конкурсның төп өлешендәге мәсьәләләр инде катлаулырак һәм игътибарны күбрәк җәлеп итүне сорый. Жюри конкурска бирелгән вакытны кирәк чакта озынайта да ала.

Мәсьәләләрнең җаваплары алдан жюри төзегән тест программалары ярдәмендә кыска арада тикшерелә алалар. Әлеге тестлар программаның җавапны никадәр тиз чишүен дә билгеләргә сәләтле. Төп турда иң күп балл җыйган команда беренчелекне яулый. Бер үк санда балл җыйган очракта мәсьәләне чишүгә киткән вакытка игътибар бирелә.

Турнирда катнашу өчен сайлап алу турнирын узарга кирәк.

Барлык сораулар белән оештыру өчен җаваплы түбәндә күрсәтелгән кешеләргә шалтырата аласыз:

Артамонов Анатолий Викторович, e-mail ava@icl.kazan.ru, тел. (843) 272-81-71;

Хафизова Светлана Фердинант кызы, e-mail ksf@icl.kazan.ru, тел. (843) 279-51-16.