Киләсе уку елында илнең барлык 9 нчы сыйныф укучылары да яңа форма дәүләт йомгаклау аттестациясе узачак. Бу турыда кичә Россия мәгариф күзәтчелеге хәбәр итте.

Тугызынчылар өчен имтихан биремнәре (контроль-үлчәү материаллары - КИМнар) чыгарылыш сыйныф укучыларына әзерләнгән БДИ принцибы буенча эшләнәчәк. Димәк, тугызынчы сыйныфны тәмамлаучы кызлар-егетләр тест рәвешендәге биремнәргә дә, киңәйтелгән җаваплар таләп итүче сорауларга да җавап бирәчәк.

Бердәм дәүләт имтиханыннан аермалы буларак, тугызынчы сыйныфлар өчен уздырылган сынауларны Россия Федерациясе субъектларының мәгариф идарәләре күзәтүе астында муниципаль, округ һәм территориаль имтихан үткәрү комиссияләре уздырачак.

Тагын бер саллы аерма – имтихан нәтиҗәләре 100 баллы шкалага күчерелмәячәк. Билгеләрне, гадәттәгечә, 5 баллы системага нигезләнеп куячаклар.