Кризис, кризис, дисәк тә укытучыларның хезмәт хакы мондый шартларда киметелмәячәк. Бу турыда кичә журналистларга Россия Федерациясенең Мәгариф һәм фән министры Андрей Фурсенко хәбәр итте.

«Укытучыларның хезмәт хакы кыскартылмаячак – бу дәүләт гарантиясе», - дип белдерде министр. Андрей Фурсенко сүзләренә караганда, былтыр педагогларның хезмәт хакы күләме 30 процентка арттырылган. Быел ул бер тиенгә дә киметелмәячәк.

Ләкин өч елга планлаштырылган бюджет белән чагыштырганда мәгариф өлкәсен үстерүгә китәчәк финанслар күләме киметелергә мөмкин. Ихтыяҗ булган белгечләрне әзерләү өчен казнадан 40 миллиард сум акча бүленеп бирелгән. Димәк, аның бер өлеше барыбер мәгариф оешмаларына кайтачак, дип ачыклык кертте министр.

Министр ассызыклавынча, финанс кыскартулар беренче чиратта капиталь кертемнәргә кагылачак.