Агымдагы елның 19-20 мартында Татар дәүләт гуманитар-педагогика университетында Мәскәү чит телләр институты һәм Кембридж университеты Имтихан синдикаты делегациясе булачак. Әлеге делегацияне Кембридж университетының Россиядәге Имтихан үзәге директоры Амет Александрович Володарский һәм Имтихан синдикатының төбәк үсеше буенча директоры Крис Скот-Баррет җитәкли.

ТДГПУдан алынган мәгълүматларга караганда, әлеге сәфәрнең максаты – университет белән танышу, әлеге вуз базасында Cambridge ESOL имтиханнарын тапшыру буенча үзәк төзү нисбәтеннән сөйләшүләр алып бару.

20 мартта ТДГПУда Казан һәм Татарстан студентларын Cambridge ESOL имтиханнарын тапшыруга әзерлекне тәэмин итү һәм бу өлкәдә хезмәттәшлек итү турында Меморандумга кул кую көтелә. Моның нигезендә студентлар Cambridge ESOL имтиханнарын Казанда тапшыра алачак.

Бөекбританиянең борынгы вузларыннан берсе булган уку йорты белән хезмәттәшлек итү Татарстан өчен дәрәҗә саналып, фәнни һәм академик алмашуларны: уртак фәнни тикшеренүләрне, конференцияләрдә катнашуны, фәнни һәм тел өйрәнү буенча стажировкаларны, мәкаләләр белән, уку планнары, укыту методикалары алмашуны күз алдында тота.

Чыганак: www.tat.tatar-inform.ru