Инде 5 ел дәвамында интернет челтәрендә “ТатНет йолдызлары” (“TatNet yoldizlari” – ТАТар ИнтерНЕТы сүзләрен кыскартып ясалган) дип исемләнгән Халыкара интернет-проектлар конкурсы оештырылып килә. «ТатНет йолдызлары” конкурсы ел саен Интернет челтәрендә татар телендә Татарстан Республикасы һәм татар халкы турында сөйләүче информацион ресурслар турында хәбәр итә һәм аларның рейтингын билгели. 2003 елда үз эшен башлаган бу Халыкара конкурсның оештыручысы һәм хәзерге вакытта координаторы - Айнур Сибгатуллин. Проектны гамәлгә ашыручы һәм оештыруда төп роль уйнаучы - Татарстан Республикасының “Татмедиа” массакүләм мәгълүмат агентлыгы.

Әлеге конкурста “Наука и образование” һәм “Мәгариф һәм фән” номинацияләре дә бар. Бу номинацияләрне өстәү тәкъдиме белән моннан 2 ел элек, ул вакытта Татарстан Республикасының Мәгариф һәм фән министрлыгында Мәгарифне мәгълүматлаштыру бүлеге мөдире, Раил Гатауллин чыккан булган.

“Мәгариф һәм фән” номинациясендә мәгариф темасына кагылышлы теләсә нинди сайт катнаша ала. Бу – иң беренче чиратта, мәктәп сайтлары, укытучылар һәм укучылар ясаган сайтлар. Бүгенге көндә әлеге номинациядә “Бөтендөнья татар телендә белем бирүче укытучылар форумы” (http://forum.belem.ru), Татарстан Республикасы Мәгариф һәм фән министырлыгының Мәгариф порталы (http://edu.kzn.ru/tatar), Балтач районының авторлык “Көнбагыш” программасы (http://konbagish.narod.ru), Азнакай районының Ильбяково гомуми урта мәктәбе (http://ilbyak-school.ucoz.ru), Тат Бүләр урта гомуми белем бирү мәктәбе (http://tatbylar.narod.ru), Яңа Чишмә районының Шахмайкино урта мәктәбе (http://shaxmay.narod.ru), татар виртуаль гимназиясе (http://tatar.org.ru) катнашалар.

Әйтеп үтелгән проектлар бик тә кызыклы. “Бөтендөнья татар телендә белем бирүче укытучылар форумы” барлык укытучыларны да үзара интернет-мәйданда аралашырга һәм фикер алышырга чакыра, күп төрле ярдәм күрсәтергә омтыла. Татарстан Республикасы Мәгариф һәм фән министырлыгының Мәгариф порталы Татарстанда, Россиядә һәм чит илләрдә булган мәгариф яңалыклары белән таныштырып бара, укытучыларны электрон ресурслар белән тәэмин итә. Мәктәп сайтлары да үзләренең оригинальлекләре һәм эчтәлекләре белән укучылар өчен файдалы.

Конкурсантларның һәммәсендә дә уңышлар теләп каласы килә.