Татар мәгарифе порталы
Сез монда
“Агымдагы елның июнь аенда яңа буын федераль дәүләт белем бирү стандартлары, Россия Федерациясе Мәгариф һәм фән министрлыгы тарафыннан тикшерелеп, стандартның инвариатив (предметлар мәҗбүри укытылырга тиешле) өлешенә туган телләрне өйрәнү кертелде. Элек, билгеле булганча, туган телләрне өйрәнү стандартның вариатив, ягъни сайлап алына торган өлешенә карый иде. Хәзерге вакытта стандартны эшләүчеләр “туган телләрне өйрәнү укытучы, бала һәм ата-аналар теләсә керергә тиеш” дигән формулировка белән эш итә. Ә без укучылар арасында шул телләрне йөртүчеләр булганда кертергә кирәк дигән тәкъдим белән чыктык”, - дип белдерде бүген Казан шәһәре Авиатөзелеш районы татар теле укытучыларының август киңәшмәсендә башкаланың Мәгариф идарәсе башлыгы урынбасары Илдар Мөхәммәтов.
Аның сүзләренчә, бу елның 1 нче сентябреннән татар теле бетә дигән сүзләр дөреслеккә туры килми. Үзгәрешләр киләсе уку елыннан булачак һәм алар башлангыч сыйныфларга гына кагыла, - ди И.Мөхәммәтов.
Илдар Мөхәммәтов үз чыгышында башлангыч мәктәп өчен төп гомум белем бирү программасына “Укучыларга рухи-әхлакый тәрбия бирү” предметының кертелүен белдерде. Билгеле булганча, әлеге предметны кертү зарурлыгы турында РФ Президенты Дмитрий Медведев агымдагы елның 21 нче июлендә Россиядәге традицион конфессияләр вәкилләре белән очрашу вакытында әйткән иде. И.Мөхәммәтов сүзләренчә, концепциянең икенче вариантында Россиянең күпмилләтле ил һәм диннең мәктәптән аерылган икәнлеге исәпкә алынган. “Бүгенге көндә мәктәпләргә “Россия халыклары рухи мәдәнияты” дигән курс кертеп җибәрү турында сүз бара. 18 субъект тәҗрибә уздыру өчен сайлап алынган. Әлегә Татарстан экспериментта катнашмый”, - диде ул.
И.Мөхәммәтов киңәшмәдә бу предметны ничек, нинди дәреслекләр белән укытырга, дигән сорауларны күтәреп чыкты. “Чөнки бер сыйныфта берничә милләт баласы утыра, атеист булганнары да бар. Шуңа күрә әлеге дәреслек толерантлыкка корылган булырга тиеш. Бала башына “без толерантлы булырга тиеш, ә бу – зур байлык” дигән төшенчәне салу зарур”, - диде ул.
Чыганак: www.tat.tatar-inform.ru
Фикерләр
Кунак
1 Сентябрь, 2009 - 12:56
Permalink
Бик яхшы!
Уз оен, уз телен турында кайгыртмасан, башка тел, башка ил сине басып ала (рус телен инглиз теле баса барган кебек).