Татар мәгарифе порталы
Яңа уку елында Чиләбенең 116 номерлы мәктәбендә татар теле дәресләре укытыла башлады. Монда белем алучы 15 укучы курслар ачылганчы ук Тукай телен үзләштерү теләге белән чыккан булган.
Татар теле курсларын ачып җибәрү өчен нәкъ менә әлеге мәктәпнең сайлануы юкка түгел. Бу микрорайон татарлар күпләп яши торган төбәкләрнең берсе булып санала, ә 116 нчы белем бирү йорты исә халык өчен төп мәдәният учагы ролен үти.
Бактың исә, элегрәк бу мәктәптә милли фольклор коллективы эшләгән икән. Төрле милләт балалары җыелышып, татарча җырлар өйрәнгәннәр, төрле бәйрәм һәм фестивальләрдә һәрвакыт призлы урыннар яулый торган булганнар. Берничә ел элек бу түгәрәк бетерелгән.
Яңа уку елыннан исә мәктәптә татар теле рәсми рәвештә факультатив дәрес буларак укытыла башлаган. «Моңа кадәр безнең татар телен укыткан булмады. Хәер, укучылар татар теле буенча фән олимпиадаларында, Муса Җәлил иҗатына багышланган шигырь бәйгеләрендә катнаша килде. Бер генә конкурстан да призлы урынсыз кайтканнары булмады. Быел исә бүләкләр саны тагын да артыр, мөгаен», - дип өметләнә мәктәп укытучылары. Иң мөһиме, Тукай телен үзләштерергә теләүчеләр арасында татарлар гына түгел, ә рус, чегән, таҗик милләтеннән булган укучылар да бар икән.
Татар теле дәресләре өчен атнасына барлыгы 9 сәгать вакыт каралган. Лексика, грамматика һәм дөрес әйтелеш белән беррәттән укучыларга татарча җыр дәресләре дә укытылачак, дип хәбәр итә Чиләбе татарлары конгрессының рәсми сайты.
Фикерләр
Раил Гатауллин
6 Сентябрь, 2013 - 16:41
Permalink
Татар теле укытыла башлаган
Рәхмәт, Динар! Чынлап та, татар теле генә укытыла башлаган, татар телендә укыта башламаганнар. Яңалык исемен алыштырдык.
Ихтирам белән, Раил Гатауллин
qdb
6 Сентябрь, 2013 - 16:38
Permalink
татарча укыта башламаган бит!
татарча укыта башламаган бит! раил, шулай "робот шикелле" генә "копи паст ясау" әйбәт түгел инде!
qdb
6 Сентябрь, 2013 - 16:44
Permalink
татарча укыта башласалар да ,
татарча укыта башласалар да , бу сүзгә андый мәгънә салынырга тиеш түгел , чөнки бу укучыны ялганлау, ялгыш аңлаттыру була