«Күкләрдә һәм җирдә падишаһлык - Аллаһныкы! Ул теләгәнен яратып барлыкка китерә. Теләгәненә кыз бала бирә, теләгәненә ир бала бирә. Яки аларга ир бала да, кыз бала да бирә һәм теләгәнен үрчемсез итә», диелгән «Әш-Шүрә» сурәсендә (49-50 аятьләр).

Статистика мәгълүматлары буенча, Татарстанда һәр дүртенче гаилә - баласыз. Менә шул сәбәп баласыз гаиләләрне «Гаиләне планлаштыру үзәге» нә китерә дә инде.

Әлеге үзәккә Татарстанда яшәүче ир яки хатын бала табуга бәйләнешле һәртөрле четерекле мәсьәләләр буенча мөрәҗәгать итә ала. Биредә барысы да югары һөнәри дәрәҗәдә хәл ителә: лаборатор анализлар ясала, андролог ярдәме күрсәтелә. Табигый дәвалану ысулларыннан тыш, ярдәмче технологик чаралар да киң кулланыла. Мәсәлән, экстракорпораль технология, халыкка ул «пробиркадагы яралгы» буларак таныш.

Үзәктә донорлык программасы да эшли. «Суррогат» аналар хезмәтеннән файдаланучылар аз түгел. Кайсы очракта эшләнә соң бу эш? Әгәр хатын-кызның аналыгы операция юлы белән алып ташланган яки күкәйлекләре сәламәт түгел икән - суррогат аналар ярдәмгә килә дә инде. Аның карынына ир белән хатынның биологик материалы урнаштырыла, ул аны 9 ай күтәреп йөртә, тугач, баланы чын әти-әнисенә тапшыра.

Әгәр суррогат ананың күкәй күзәнәкләре донор буларак кулланыла икән, ул вакытта балада аның тышкы охшашлыгы чагылырга мөмкин. Шуңа күрә бу программага мөрәҗәгать итүче парлар донорның үзләренә охшашрак булганын сайлый. Шунысы мөһим: суррогат аналар соматик һәм генетик яктан сәламәт булырга тиеш.

Әлбәттә, бу эш нотариус тарафыннан расланган килешү нигезендә, аноним рәвештә башкарыла, баланың биологик булмаган әнисе яки әтисе турындагы мәгълүматлар сер итеп саклана.

Бала - бәхет ул. Гаиләләргә тулы бәхет бүләк итүче мондый үзәкләр бик кирәк. (Вакытлы матбугаттан)