Үз квалификацияләрен күтәрергә теләгән Казан мәктәп укучылары һәм укытучылары IT-юнәлешләр буенча бушлай онлайн-курслар уза алачак. Программада робот техникасы, мәгълүмати иминлек һәм мәгариф учреждениеләрен цифрлаштыру буенча дәресләр каралган.

Иннополис университетының Югары белем бирү үзәге белгечләре өч курс әзерләгән. «Өйрәнә башлаучылар өчен робот техникасы, 5-7 сыйныф» курсы 32 сәгатькә исәпләнгән. Бу «LEGO EV3 ярдәмендә белем бирү робототехникасы нигезләрен укыту» программасы буенча квалификация күтәрүнең онлайн-курсы. Ул физика, информатика һәм гомуми белем бирү оешмалары укытучылары, шулай ук өстәмә белем бирү педагоглары өчен каралган.

Курсны тыңлаучылар робототехника нигезләре өлкәсендә LEGO EV3 файдаланып һөнәри компетенцияләр камилләштерәләр, белем бирү процессында җиһазларны нәтиҗәле файдалану һәм командаларны төрле дәрәҗәдәге робототехник ярышларда катнашуга әзерләү күнекмәләрен алачаклар.

«Мәгълүмати куркынычсызлыкка керешү» онлайн-курсы беренче чиратта 12-дән 17 яшькә кадәрге мәктәп укучыларына исәпләнгән, әмма тыңлаучыларның киң даирәсенә дә кызыклы булачак. Укый башлау өчен махсус белем таләп ителми. Укыту нәтиҗәләре буенча тыңлаучылар программалаштырырга, кушымталар һәм веб-сайтлар булдырырга, үз мәгълүматларын һәм шәхси мәгълүмат киңлеген якларга өйрәнәчәк. Шулай ук дәресләрдә интернетта мошенниклык төрләре һәм аларга каршы көрәш ысуллары каралачак. Мәктәп укучылары аларны янаулардан саклау өчен программаларда һәм системаларда көчсез урыннар таба алачак.

Педагогларга һәм мәгариф учреждениеләре җитәкчеләренә «Мәгариф учреждениеләрен цифрлаштыру» курсы исәпләнгән. Укулар белем бирүнең дистанцион форматына нәтиҗәле күчәргә ярдәм итәчәк.

Тыңлаучылар электрон көндәлекне, коммуникация системасын, кадрлар электрон системасын, цифрлы белем бирү ресурсларын, уку әдәбиятының электрон фондын һәм олимпиада хәрәкәтен үстерү буенча алынган күнекмәләрне практикада куллана алачак.

Моннан тыш, дәресләрдә башлангыч, гомуми, урта һөнәри һәм өстәмә белем бирү өлкәсендә Татарстан тәҗрибәсен карау, балаларны интернетта хокук боза торган, тискәре мәгълүматтан яклау механизмнарын һәм белем алучылар өчен бердәм мәгълүмат бирү тирәлеген үстерү перспективаларын өйрәнү планлаштырыла. Курска сылтама буенча язылырга мөмкин.

Дәресләр видеодәрес форматында тәкъдим ителгән. Методик материалларга керү мөмкинлеге алу өчен Иннополис университетының Moodle белем бирү платформасында теркәлергә кирәк. Программаны уңышлы үзләштергән тыңлаучылар сертификат алачак, дип хәбәр итә ТР Саннар министрлыгының матбугат хезмәте.