Татар мәгарифе порталы
Сез монда
Хөрмәтле татар әдәбиятын сөючеләр!
II Россиякүләм "Әдәби җәүһәрләр" бәйгесенең беренче туры шуның белән тәмам. 31 март көнне бәйгенең беренче турының ахыргы викторинасы үткәрелде - җиденче финалист ачыкланды. Шулар арасыннан 7 кеше викторинаны үтә алмадылар (40 тан кимрәк балл җыйдылар), ә 7 кеше 100 балл җыя алды. Галимҗан Ибраһимовка багышланган викторинада барлыгы 100 гә якын кеше катнашты.
Кызганыч, әмма бу юлы да викторинаны бер үк компьютерда берничә тапкыр үтү очраклары теркәлде. Алар арасында күбрәк балл җыярга тырышучылар да, бер компьютер аша берничә кешенең үз белемнәрен сынап карарга теләгәннәре дә бар.
Әйдәгез, иң элек нәтиҗәләргә күчик. Викторинаның барлык сорауларына да дөрес җавапны түбәндәге кулланучыларыбыз таба алды:
- Гүзәлия Наматова (Яшел Үзән);
- Әлфия Мостафина (Казан);
- Гөлшат Шәрипова (Актаныш);
- Венера Хөсәенова (Апас);
- Язгөл Басырова (билгесез, сәхифәсендә үзе турында мәгълүмат күрсәтелмәгән);
- Чулпан Төхвәтуллина (Яшел Үзән);
- Гөлүсә Төхвәтуллина (Яшел Үзән).
Иң тиз җавап 1 минут 53 секундта, икенче шундый тиз җавап бирүче 2 минут 6 секундта җавап биргән. Әмма бу ике җавап та бер үк IP-адрестан (84.18.120.120) бирелгән. Шунысы кызык, 2 минут 6 секунд эчендә җавап бирүче викторинаны 15:10 сәг. тәмамлаган, ә 1 минут 53 секунд эчендә җавап бирүче кеше викторинаны 15:14 сәг. тәмамлаган. Ягъни, викторинаны ике кеше исеменнән теркәлеп бер үк кеше узган булуы, нәтиҗәне тагын да яхшыртырга тырышкан булуы бик ихтимал. Килешәсездер, 2 минут 6 секунд эчендә алданрак бирелгән җавап гаделрәктер. Шуңа, озаграк җавап биргән булса да, бу кешегә без беренчелекне бирергә булдык. Ул кешебез - Язгөл Басыйрова. Без аның кайсы уку йортыннан икәнен ачыкладык. Ул - ТР Актаныш районы Пучы урта урта гомуми белем бирү мәктәбенең 6 класс укучысы!!!
Без чын күңелдән Язгөлне әлеге уңышы - I урын алуы белән котлыйбыз һәм әдәбият галимнәре һәм язучылар каршында күзгә-күз карап сынау бирергә финал турына чакырабыз! Яшь кенә булса да, аның сәләтле кыз икәнен без интернет-чыганаклардан укып беләбез. Финал бәйгесендә ул татар әдәбиятыннан үзенең белемнәре тирән булуын дәлилли алыр, дип ышанып калабыз! (PS. Язгөлнең финал турына килә алмавы аның әлеге онлайн-викторинада җиңүен шик астына куячак.)
II урынны ТР Актаныш районы Пучы урта урта гомуми белем бирү мәктәбенең тарих укытучысы Гөлшат Әхмәтшәех кызы Шәрипова яулады. Аны да финал бәйгесенә тамашачы буларак чакырабыз.
Финал тантанасына чакырылучы өченче кеше, III урын яулаучы - Наматова Гүзәлия Ансар кызы, ТР Яшел Үзән районы Васильево 2 нче номерлы урта гомуми белем бирү мәктәбенең татар теле һәм әдәбияты укытучысы (2 минут 46 секунд).
Шул рәвешле, безнең гран-при өчен финал турында катнашачак 7 финалист билгеле булды. Алар:
- Мостафина Әлфия Вахит кызы, Татарстан Республикасы Балык Бистәсе районы Ямаш урта мәктәбенең югары кв.категорияле татар теле һәм әдәбияты укытучысы;
- Исмәгыйлова Рәзинә Гыйльмегаян кызы, Татарстан Республикасы Казан шәһәре Идел буе районы 127 нче номерлы урта гомуми белем бирү мәктәбенең I кв.категорияле татар теле һәм әдәбияты укытучысы;
- Мәхмүтова Гөлшат Рәзин кызы, Татарстан Республикасы Алабуга шәһәре аерым предметлар тирәнтен өйрәнелә торган 9 нчы урта гомуми белем мәктәбенең югары кв.категорияле татар теле һәм әдәбияты укытучысы;
- Галләмова Гөлназ Мөбәрәк кызы, Татарстан Республикасы Актаныш районы Яңа Әлем мәктәбенең татар теле һәм әдәбияты укытучысы;
- Гыйләҗева Фирая Хәниф кызы, Татарстан Республикасы Лениногорск шәһәре 2 нче номерлы урта мәктәбенең югары калификацияле татар теле һәм әдәбияты укытучысы;
- Садриева Энҗе, Татарстан Республикасы Әтнә районы Күәм урта гомуми белем бирү мәктәбе укучысы;
- Басыйрова Язгөл, Татарстан Республикасы Актаныш районы Пучы урта гомуми белем бирү мәктәбе укучысы.
Әлеге җиде финалистны һәм II, III урын алучыларны без финал тантанасында көтеп калабыз. Якын көннәрдә, бәйгенең төгәл урыны һәм вакыты билгеле булгач, Белем.ру порталында бу турыда тагын бер мәртәбә игълан урнаштырырбыз һәм рәсми рәвештә чакыру юлларга тырышачакбыз.
Бәйгенең финал туры үткәннән соң викториналар һәркем өчен ачык булачак һәм теләгән һәркем татар язучыларының тормыш юллары һәм иҗаты белән якыннан таныша алачаклар, дип ышанып калабыз.
ps. Татнетны үстерү фондының расчетный счеты алышыну сәбәпле (Интехбанк ябылды), түләүләр башкару формасына үзгәртүләр кертелде һәм Яндекс роботлары бу гамәлне шикле дип тамгалады - түләүләр башкаруны тыйды. Әлеге аңлашылмаучаyлык якын көннәрдә хәл ителәчәк һәм түләүләр башкару торгызылачак, дип өметләнәбез. Якындагы 5 көндә мәсьәлә хәл ителмәсә, без дипломнар һәм сертификатлар тапшыруның башка уңайлы юлын табачакбыз һәм Яндекс белән әлеге төр хезмәттәшлекне өзәчәкбез.
Фикерләр
Раил Гатауллин
4 Апрель, 2017 - 22:21
Permalink
Сертификатлар сорату мөмкинлеге торгызылды!
Хөрмәтле кулланучыларыбыз!
Яндекс.Акча системасында "техник сбой" булган, түләүләр мөмкинлеге Яндекс тарафыннан бүген кич торгызылды. Сертификатларны http://belem.ru/payment адресы буенча күчеп соратырга мөмкин.
Ихтирам белән, Раил Гатауллин