Татар мәгарифе порталы
Порталыбызның даими кулланучылары, кунаклары - мөхтәрәм укытучылар, укучылар һәм татар мәгарифе белән кызыксынучылар!
Яңа 2017 ел башланырга санаулы сәгатьләр калып бара. Барыбыз да аннан бары тик яхшы яңалыклар гына көтә, киләсе елда бар да яхшы булуын тели. Без дә киләсе елда бар да яхшы булыр дип ышанып калабыз һәм алдыбызга яңа планнар куеп яшибез. Киләсе елларда да сезне порталыбызда көтеп калабыз. Белем.ру порталы сезгә белем дөньясында һәрвакыт якын ярдәмчегез булыр, без оештырган бәйгеләр сезне яңа үрләргә күтәрер дип өметләнәбез.
Белем.ру порталы һәм үзем исемемнән сезне Яңа ел белән котлап үтәсем килә. Барлык изге теләкләрегез чынга ашсын, сау-сәламәт булыгыз. Ә инде Яңа ел бүләге буларак сезгә шигыремне бүләк итәргә булдым:
Һәрбер елның була үз шатлыгы,
Борчулары була кайвакыт.
Үкси-үкси мендәр кочаклый я
Тальян уйный күңел сайратып.
Борчулары сабак булсын безгә,
Шатлыклары бәхет китерсен.
Яңа елның нинди булуның бит
Үзебездән тора күбесе.
Күпме генә каршы алсам да гел
Яңа елны көтәм зарыгып.
Яхшысына якты өмет юрап
Искесеннән киләм арынып.
Яңа елда яңа бәхет килсен -
Шатлыкларга табыйк буш урын!
Яңа елда телим һәммәбезгә
Шатлыкларның күбрәк булуын.
Иң беренче булып үзебез без
Башкаларга шатлык өләшик.
Килә икән, шатлык-кайгыларны
Уртаклаша белик берләшеп!
Иң изге теләкләр белән, Белем.ру порталы җитәкчесе Раил Гатауллин