Якындагы берничә көндә Казан федераль университеты IX-XI сыйныф укучылары арасында 15 предметтан бушлай олимпиадалар үткәрә. Олимпиадалар ике турда үтәчәк. Сайлап алу этабы шушы көннәрдә интернетта, ә йомгаклау этабы гыйнвар-март айларында университетның үзендә үтәр, дип планлаштырыла. Безгә билгеле мәгълүмат буенча, олимпиада көннәре түбәндәгечә:

• 6 декабрь - физика, тарих һәм инглиз теле
• 7 декабрь - татар теле һәм география
• 8 декабрь - математика, француз һәм алман телләре
• 9 декабрь - информатика, рус әдәбияты һәм геология
• 10 декабрь - химия һәм җәмгыять белеме
• 11 декабрь - биология һәм рус теле.

Катнашучыларга сертификатлар, йомгаклау турында беренче урын алган XI сыйныф укучыларына КФУга укырга кергәндә БДИ балына өстәп ике балл, ә призерларга 1 балл биреләчәк. Җиңүчеләрне әзерләгән укытучыларга да КФУ ректоры кул куйган дипломнар тапшырылачак.

Тулырак мәгълүматны kpfu.ru/fdo сайтының «Межрегиональные предметные олимпиады» бүлегендә алырга мөмкин (кызганыч, әмма КФУ сайтны татар телендә алып бару дәрәҗәсенә әле үсеп җитмәгән).