Хөрмәтле кулланучыларыбыз! Укытучылар, укучылар, ата-аналар, татар мәгарифе белән кызыксынучылар!

Белем.ру порталында әлеге вакытта берьюлы 3 бәйге бара, сез аларның барысында да диярлек катнаша аласыз!

1. "Белем җәүһәрләре" дөньякүләм файдалы татар интернет-проектлары бәйгесе. Татарстан Республикасы Мәгариф һәм фән министрлыгы, Татарстан Республикасы Мәдәният министрлыгы, Татнетны үстерү фонды тарафыннан быел алтынчы мәртәбә үткәрелә. Әлеге бәйгедә интернет-киңлекләрендә эшләп килгән файдалы татар сайтлары авторлары һәм хуҗалары катнаша ала. Игътибар! Бәйгегә гаризалар кабул итү 13 сентябрь көнне 23:59 тәмамлана! Тулы мәгълүмат >>

2. "Айның иң яхшы ресурсы" бәйгесе. Бәйге Татнетны үстерү фонды һәм Белем.ру порталы тарафыннан оештырыла. Бәйге уку елы барышында (сентябрь-май) үткәрелә. Бәйгедә катнашу өчен Белем.ру порталына файдалы белем бирү ресурсын юлларга кирәк. Ай саен килгән ресурслар арасыннан иң яхшысын сайлау максатыннан порталда онлайн тавыш бирү оештырыла. Ресурслар кабул итү инде башланды! Тулы мәгълүмат >>

3. "Әдәби җәүһәрләр" россиякүләм татар әдәбиятын сөючеләр бәйгесе. Татарстан Язучылар берлеге, Татарстан Республикасы Мәдәният министрлыгы, Татнетны үстерү фонды һәм башка күп санлы оешмалар тарафыннан оештырыла (оештыручыларның тулы составы якын көннәрдә расланып игълан ителәчәк). Бәйге әле 4 сентябрь көнне генә башланып китте. Бәйгенең сентябрь ае туры танылган татар драматургы Таҗи Гыйззәткә багышлана. Белем.ру порталында Нигезләмә проекты белән якыннан танышырга мөмкин. Тулы мәгълүмат >>

Сезне үзебезнең бәйгеләрдә көтеп калабыз, барыгызга да уңышлар телибез!