Татар мәгарифе порталы
Сез монда
Актаныш сәләтле балалар гуманитар гимназиясендә белем алган Айдар Шәйхинны Тукай дип йөртәләр. Түбәтәй кия ул. Әлеге кушаматын да шуңа бәйли. “Әмма алай дип дәшүләре бер дә ошамый. Тукай булыр өчен, моңа лаек булырга кирәк”, – ди Айдар.
Күптән түгел “Умники и умницы” уенының республикакүләм этабында ул беренче урынны алган иде. Анда һәр районнан ике-өч сәләтле укучы катнашты. Егет-кызлар ярымфиналда Татарстан тарихы һәм рус теле буенча язма биремнәр эшләде, соңрак афоризмнар буенча кыска чыгыш ясап, сөйләм осталыгын күрсәтте.
Ә финалда барысы да Беренче каналдагы бәйге кебек оештырылган иде. Айдар сынауларны уңышлы үтеп, Мәскәүдә декабрь аенда узачак “Умницы и умники” тапшыруына бару хокукын яулады. Анда Татарстаннан республика этабы җиңүчеләре һәм призерлары булган биш кеше катнашырга җыена.
Бәйге шактый катлаулы булган. Ләкин Айдарның үз мантыйгы. “Җиңел бәйгеләрдә ирешкән нәтиҗәнең тәме булмый. Ә монда тырышырга туры килде. Бер укытучым әйткәндәй, белмәгәннәрне искә төшерергә кирәк иде. Татар тарихы белән кызыксынуым гамәли яктан булышса, берничә ел Коръән мәҗлесләрендә катнашуым сүз осталыгы бәйгесен узарга ярдәм итте, – ди ул. – Дөресен әйтим, Мәскәүдә узачак бәйгегә артык зур өметләр дә багламыйм. Җиңүчегә төп бүләк Мәскәү дәүләт халыкара багланышлар институтына (МГИМО) укырга керү булачак. Әмма ул уку йортында белем алу теләге белән янмыйм. Һәрхәлдә, бәйгедә рухи азык өчен катнашачакмын. Ә инде хакимият ярдәменә килгәндә, Татарстан һәрвакыт үз балаларына ярдәм итә”. Сәер, берәү булса, МГИМОга керәчәкмен дип тырышыр иде, ә Айдарга ул кирәкми. Хәер, аның теләге булса, бәйгедә җиңмичә генә дә керәчәк ул. Киләчәктә кайсы уку йортына документ тапшырачагын белми әле. “Акыл белән йөрәк ярыша. Кайсы җиңә, шул кушкан уку йортына барачакмын, Аллаһы боерса”, – ди егет.