Татар мәгарифе порталы
Сез монда
Кичә Түбән Камада Республика Хәйрия советы утырышы вакытында ТР Президенты Минтимер Шәймиев беренче сыйныф укучыларына гына түгел, мәктәпкә берничә баласын озаткан ишле гаиләләргә дә ярдәм күрсәтү зарур, дип белдерде.
М.Шәймиев искәрткәнчә, алдагы көнне Татарстанда “Мәктәпкә җыенырга ярдәм ит” республика хәйрия акциясе старт алды. “Без баласын мәктәпкә әзерләгәндә һәр дүртенче-бишенче гаиләнең ярдәмгә мохтаҗлыгын ачыкладык”, - дип билгеләп үтте Татарстан Президенты. Ул ассызыклаганча, беренче сыйныфка баручы балаларга гына түгел, ишле гаиләләргә дә ярдәм итәргә кирәк. “Мәхрүм ителгән гаиләләр булмаска тиеш, - диде республика башлыгы. – Мәктәпкә баручы балалар үзләрен бертигез тәэмин ителүен тоярга тиеш”.
Татарстан Президенты билгеләп үткәнчә, узган хәйрия елы шактый эчтәлекле булды, аңа исем бирүдән тыш, реаль эчтәлек белән тулыландыруга да ирешелде. Гаилә елы, үз чиратында, Хәйрия елының традицияләрен алды. “Узган ел без әйбәт эшләдек, әйдәгез, бусын тагын да яхшырак итик”, - дип өндәде Илбашы.
Журналистларга ТР Президентының социаль мәсьәләләр буенча дәүләт киңәшчесе Татьяна Ларионова белдергәнчә, “Мәктәпкә җыенырга ярдәм ит” акциясе республикада икенче елын киң колачлап уздырыла. Быел 1 сентябрьдә 34,5 мең бала тәүге мәртәбә мәктәп ишекләрен ачып керәчәк. Әмма һәр бишенче бала теге яки бу күләмдә социаль ярдәмгә мохтаҗ. Болар – аз тәэмин ителгән, күп балалы гаиләләрдә тәрбияләнүче һәм инвалид балалар. Шуңа күрә быел акция өч юнәлешле яңа форматта үткәреләчәк.
“Беренчедән, без аз тәэмин ителгән гаилә балаларына мәктәпкә җыенырга булышачакбыз, ә бу 7 меңнән артык сабый дигән сүз, бүген һәр район һәм шәһәрдә тулы исемлекләр тупланган. Икенче юнәлеш кысаларында 5 һәм аннан да күбрәк бала тәрбияләнгән гаиләләрдә, сыйныфына карамастан, нарасыйларын мәктәпкә әзерләргә ярдәм итәчәкбез. Өченчедән, Казанның Универсиада уздыру хокукын яулавын исәпкә алып, әлеге чарага физик яктан яхшы әзерләнү зарур дип саныйбыз. “Спорт йолдызлары - балаларга” – акциябезнең өченче юнәлеше әнә шулай дип атала. Аның максаты спортчыларның спорт киемнәре, башка спорт кирәк-яраклары белән беренче сыйныф укучыларына ярдәменнән гыйбарәт”, - дип аңлатты Т.Ларионова.
Аның сүзләренә караганда, акция кысаларында канцелярия тауарлары кибетләрендә сатып алынган тауарларның бер өлешен аз тәэмин ителгән гаиләләргә бирү өчен махсус җыю урыннары булачак. Һәр көн нәтиҗәләре буенча, әлеге канцтауарлар кибет урнашкан район штабына тапшырылачак һәм беренче сыйныф укучысы өчен кирәк-яраклар тупланачак.
Беренче сыйныф баласы өчен кирәкле комплект исемлеге билгеләнгән, һәм бүген мәктәп кирәк-яраклары сатыла башлаган һәр кибеттә җыелган ранецларны сатып алып штабка тапшырырга мөмкин.
“Кешеләр ни рәвешле игелек кыла алуларын белсен өчен бу кибетләрнең һәм штабларның адреслары атна дәвамында игълан ителәчәк”, - дип белдерде Т.Ларионова.